Atë Lombardi: hetime në Vatikan për imzot Skaranon; tolerancë zero për çdo veprim
ilegal
Lidhur me ngjarjen, që ka të bëjë me imzot Nuncio Skaranon dhe hetimet e hapura për
veprimtarinë e tij nga autoritetet vatikanase, për të hedhur dritë mbi dyshimet e
lindura, drejtori i Sallës vatikanase të Shtypit, atë Federiko Lombardi, jep disa
sqarime të reja:“Me urdhëresën e 9 korrikut, lexohet në notën zyrtare, Promotori i
Drejtësisë i Gjykatës së Qytet-Shtetit të Vatikanit, vendosi ngrirjen e fondeve, regjistruar
pranë IOR (Institutit të Veprave Fetare) për llogari të imzot Nuncio Skaranos (aktualisht
i pushuar nga detyra), në kuadrin e hetimeve nga ana e autoriteteve gjyqësore vatikanase,
në vijim të raporteve mbi transaksionet e dyshuara, depozituar pranë Autoritetit
të Informacionit Financiar (Aif). Hetimet mund të përfshijnë edhe persona të tjerë.
IOR ia besoi Promontory Financial Group analizën objektive të fakteve e të rrethanave
që kanë të bëjnë me llogarinë në fjalë, duke bashkëpunuar plotësisht me organizmin
e rregullimit financiar të Vatikanit, Aif, dhe autoritetet gjyqësore, për ta ndriçuar
plotësisht këtë rast. Në këto çaste IOR po kontrollohet nga Promontory Financial
Group në të gjitha marrëdhëniet me klientët e me procedurat në fuqi kundër pastrimit
të parasë. Njëkohësisht, vijon nota, Instituti po merr masat e përshtatshme për
të përmirësuar strukturat dhe procedurat e veta. Ky proces, i nisur në maj 2013, shpresohet
të përfundojë nga fundi i vitit 2013. Siç ka deklaruar kohët e fundit presidenti,
Ernst fon Fraiberg, IOR po ndjek një vijë të qartë për identifikimin sistematik e
për tolerancë zero lidhur me të gjitha tipet e veprimtarive ilegale ose të huaja për
Statutet e Institutit, të kryera nga laikët ose klerikët.Kujtojmë se me rastin e Asamblesë
së 21-të të përgjithshme, që u zhvillua në Sun City të Afrikës së Jugut, Grupi Egmont,
në të cilin bëjnë pjesë Njësitë e Informacionit Financiar nga e gjithë bota, pranoi
në gjirin e vet edhe Autoritetin e Informacionit Financiar të Selisë së Shenjtë e
të Shtetit të Vatikanit. Pjesëmarrja në këtë grup si anëtar me të drejta të plota
do të thotë shkëmbim më i lehtë informacionesh në luftën kundër krimeve financiare.
“Pranimi i Autoritetit në Grupin Egmont – deklaroi drejtori, Rene Brylhart – tregon
për njohjen e përpjekjeve sistematike të Selisë së Shenjtë dhe të Shtetit të Vatikanit
për të zbuluar e luftuar riciklimin e parave dhe financimin e terrorizmit”. Grupi
Egmont është themeluar në vitin 1995. Aktualisht, numri i anëtarëve të tij ka arritur
në 130 vende.