Եգիպտոսի Մէջ. Իսլամ Եղբայրներու Ղեկավարներու Ձերբակալման Գիր Հրապարակուեցաւ
Եգիպտոսի պետական դատախազութիւնը հրամայեց ձերբակալել եւ բերման ենթարկել Իսլամ եղբայրներու
հոգեւոր առաջնորդ Մոհամետ Պատիհը, շարժումի ղեկավարներէն Մոհամետ Պալթաժին, շարժումի
քաղաքական թեւին` Ազատութիւն եւ արդարութիւն կուսակցութեան փոխնախագահ Իսամ Օրիանը եւ
շարք մը այլ ղեկավարներ` նախագահական պահակագունդի զօրանոցին առջեւ տեղի ունեցած բռնարարքները
հրահրելու յանցանքով: Երկուշաբթի օր տեղի ունեցած բռնարարքներուն ընթացքին աւելի քան
50 զոհ արձանագրուած էր: Իսլամ եղբայրներու բազմաթիւ անդամներ արդէն արգելափակուած են: Դատախազութիւնը
նաեւ հրամայեց վերոնշեալ դէպքի հարցով 206 անձեր արգելափակել եւ երկու հազար կինէ փրկագինով
ազատ արձակել 446 այլ անձեր: Մինչ այդ, Ազատութիւն եւ արդարութիւն կուսակցութիւնը
յայտարարեց, որ պիտի չմասնակցի ժամանակաւոր վարչապետ Հազեմ Պեպլաուիի կազմելիք կառավարութեան:
Ժամանակաւոր նախագահ Ատլի Մանսուրի բանբերը յայտնած էր, որ Ազատութիւն եւ արդարութիւն
կուսակցութեան եւս նախարարութիւններ պիտի առաջարկուի: Սակայն կուսակցութեան բարձրաստիճան
պաշտօնատարներէն Մոհամետ Քամալ «Պի.Պի.Սի.»-ին յայտնեց, որ «մենք երբեք նախարարաց խորհուրդին
մաս պիտի չկազմենք, այնքան ատեն, որ Մուրսի իբրեւ նախագահ չէ վերադարձած»: Եգիպտոսի
արտաքին գործոց նախարարութիւնը երէկ յայտարարեց, որ Մուրսի կը գտնուի ապահով վայր մը,
եւ անոր դէմ առայժմ ամբաստանութիւններ չեն ներկայացուած: Երկրի ժամանակաւոր վարչապետ
Պեպլաուի երէկ «Եոմ Սապեհ» օրաթերթին յայտնեց, որ նոր կառավարութեան կազմութեան խորհրդակցութիւնները
սկսած են երէկ եւ կը նախատեսուի զանոնք աւարտել երկու կամ երեք օրէն` նշելով, որ նոր
նախարարներու նշանակման համար նկատի պիտի առնուի փորձառութիւնն ու ատակութիւնը: Ինչ կը
վերաբերի լուծարուած կառավարութեան մէջ Ազատութիւն եւ արդարութիւն կուսակցութեան շարք
մը նախարարներու պահպանման կարելիութեան, ան ըսաւ, որ «այդ հարցը մինչեւ հիմա չքննարկուեցաւ»: Մինչ
այդ, Եգիպտոսի ընդդիմադիր Փրկութեան ճակատը երէկ յետս կոչեց սահմանադրական հռչակագիրը
մերժող իր յայտարարութիւնը: Ընդդիմադիր «Թամարրոտ» շարժումը յայտարարեց, որ նախագահ
Մանսուր սահմանադրական հռչակագիրը բարեփոխումներու ենթարկելու համաձայն գտնուած է: Եգիպտական
բանակէն աղբիւր մը քուէյթեան «Ռայ» օրաթերթին յայտնեց, որ բանակը պատրաստ է տագնապէն
դուրս գալու բոլոր առաջարկները քննարկելու, բացի Մուրսիի վերադարձէն: