«Մուրսի Պէտք Է Վերահաստատուի Իր Պաշտօնին Վրայ» Կ՛ըսէ Արընչ
Թուրքիոյ փոխվարչապետ եւ կառավարութեան բանբեր Պիւլենթ Արընչ յայտնեց, որ Թուրքիա Եգիպտոսի
դէմ պատժամիջոցներ հաստատելու կամ դիւանագիտական յարաբերութիւնները խզելու ծրագիրներ
չունի: Եգիպտական բանակի միջամտութիւնը բուռն կերպով դատապարտելէ ետք Արընչ ըսաւ,
որ Թուրքիա պիտի պահպանէ Եգիպտոսի մէջ տագնապին վերաբերեալ սկզբունքային եւ բարոյական
հիմերու վրայ հաստատուած իր կեցուածքը: Ան նաեւ քննադատեց «իր ժողովուրդին վրայ կրակ
բացող մտայնութիւնը»` աւելցնելով, որ Թուրքիա պիտի շարունակէ եգիպտացի ժողովուրդին եւ
ընտրուած նախագահ Մոհամետ Մուրսիի իր զօրակցութիւնը: Անդրադառնալով Եգիպտոսի հետ տնտեսական
կապերուն վրայ եւ Եգիպտոսի տնտեսութեան վրայ յեղաշրջումին ունենալիք ազդեցութեան` Արընչ
ըսաւ, որ Եգիպտոսի մէջ կը գործեն բազմաթիւ թրքական ընկերութիւններ, որոնք 50 հազար եգիպտացիներու
աշխատատեղիներ կ՛ապահովեն` աւելցնելով, որ ընկերութեան մը ելեւմտական հեռանկարին վրայ
ժխտական ազդեցութիւնը նաեւ Գահիրէի տնտեսութեան պիտի վնասէ: Արընչ վերահաստատեց թրքական
կառավարութեան այն կեցուածքը, թէ Եգիպտոսի պաշտօնանկ եղած նախագահ Մոհամետ Մուրսի պէտք
է իր պաշտօնին վրայ հաստատուի եւ բոլոր ձերբակալուած ղեկավարները պէտք է ազատ արձակուին,
որպէսզի քաղաքական լարուածութիւնը վերջ գտնէ: Ան աւելցուց, որ կանխահաս ընտրութիւններ
կատարելու համար ժամանակաւոր կառավարութիւն մը պէտք է կազմուի: Թուրքիոյ փոխվարչապետը
նաեւ ըսաւ, որ Թուրքիա միջազգային կազմակերպութեանց, ներառեալ` Եւրոպական Միութեան եւ
Արաբական լիկային ու այլ երկիրներու կոչ ուղղած է ճնշում բանեցնելու, որպէսզի Եգիպտոս
ժողովրդավարութիւնը յարգէ եւ պաշտպանէ: