Cikël reflektimesh mbi Katekizmin e Kishës Katolike: Dëshira për Zotin!
Në kuadrin e Vitit të Fesë, nisëm një cikël të ri kushtuar Katekizmit të Kishës Katolike,
përgatitur nga jezuiti, atë Dariush Kovalçik. Reflektimi I i kushtohej paraqitjes
dhe ftesës për ta lexuar Katekizmin. Reflektimi II titullohet “Dëshira për Zotin”.
“Dëshira
për Zotin është e shkruar në zemrën e njeriut”- ja, këto janë fjalët e para të Katekizmit.
Ky pohim na kujton se njeriu është në lidhje të përhershme me Pafundësinë. Hyji tha:
“Të dua, Adam’. E Adami u krijua. Prandaj Shën Agostini, në “Rrëfimet” e tij, shkruan:
“Na bëre për vete e zemra jonë nuk gjen prehje, derisa të pushojë në Ty”.
Dëshira
për Zotin nuk është gabim i një evolucioni të verbër, as pretendim absurd i njeriut,
që dëshiron të depërtojë në Pafundësi. Kjo dëshirë mund të realizohet e të përmbushet
vërtet. Katekizmi nënvizon se njeriu është i aftë për ta njohur Zotin, sepse kështu
u krijua – nga Zoti e për Zotin. Atëherë kjo ‘të jesh i aftë’ të takohesh të hysh
në bashkim me Zotin, nuk është shpikje e rreme. Na e dha vetë Krijuesi e Shëlbuesi
ynë. E pikërisht kjo është arsyeja më e lartë e dinjitetit njerëzor. Por, a e
ndjejmë vërtet në shpirtin tonë dëshirën për Zotin? Katekizmi thotë se kjo dëshirë
“mund të harrohet, të nënvleftësohet e deri edhe të mos pranohet aspak nga njeriu”.
Thua mund të mohohet zëri i thellë i zemrës? Një nga shkaqet e një sjelljeje të tillë
mund të jetë “rebelimi kundër së keqes”. Pastaj mund të sillemi si fara ungjillore
e hedhur ndër ferra: shqetësimet e botës e të pasurive ia marrin frymën dëshirës,
që duhet të zërë kryet e vendit në shpirtin tonë. Shkaqet e tjera të zbehjes së dëshirës
për Zotin, që i kujton Katekizmi, janë: shembulli i keq i besimtarëve, rrymat e mendimit
në armiqësi me fenë e, mbi të gjitha, prirja e njeriut mëkatar për t’u fshehur prej
syve të Zotit.
Ta marrim, pra, Katekizmin në dorë. Ta shfletojmë. Të ndalemi
tek numri 27. E të zbresim në thellësitë e zemrës sonë, për të rizbuluar dëshirën
për Zotin, domethënë, natyrën tonë të vërtetë, të thirrur për të pushuar në Hyjin
e vetëm në tri Vetje. Të shfletojmë...