Վարդավառ՝ Տօն Պայծառակերպութեան Տեառն մերոյ Յիսուսի Քրիստոսի
Յիսուսի Այլակերպութիւնը Հայ Եկեղեցւոյ հինգ տաղաւար տօներէն մէկն է: Ան կը կատարուի
Զատիկէն 14 կամ Հոգեգալուստէն 7 շաբաթ անց հանդիպող առաջին կիրակի օրը, այսինքն` ունի
35 օրուայ շարժականութիւն և կը տօնուի Յունիսի 28-էն մինչև օգոստոսի 1-ն ինկած ժամանակահատուածին
մէջ: Եկեղեցին զայն կը տօնէ երեք օր շարունակ շքեղ հանդիսութեամբ, տօնական շարականներով,
որոնք աւանդաբար կը վերագրուին Մովսէս Խորենացիին: Ըստ որոշ մասնագէտներու` Վարդավառի
տօնը կապուած է Ջրհեղեղի և Նոյի` տապանէն իջնելու յիշատակին: Նոյ Նահապետը պատուիրեր
է իր որդիներուն, ի յիշատակ ջրհեղեղի իրար վրայ ջուր թափել: Քրիստոնէութեան ընդունումէն
յետոյ տօնը նուիրուած է Յիսուսի Քրիստոսի այլակերպութեան, երբ Ան Թաբոր լեռան վրայ երեւցաւ
իր աշակերտներուն` պայծառացած կերպարանքով: Պայծառակերպութիւնը ժողովրդական լեզուով կը
կոչուի Վարդավառ` Տիրոջ վարդի հետ համեմատելու պատճառով: Ինչպէս վարդը կոկոնի մեջ ծածկուած
կ'ըլլայ նախքան բացուիլը, նոյնպէս մեր Տէրը նախքան պայծառակերպուիլը իր մեջ ունէր Աստուածութեան
պայծառութիւնը, և ինչպէս վարդը բացուելով ամենուն յայտնապէս կ'երեւի, այդպէս ալ մեր Տէրը
պայծառակերպուելով կը յայտնէ Իր Աստուածութիւնը: Ինչպէս վարդը փուշերու մեջ կը բուսնի,
այնպէս ալ մեր Տէրը հրեաներու մէջ երեւցաւ, որոնք խաչեցին զինք: Վարդը անուշահոտութիւն
կը բուրէ, այդպէս ալ մեր Տիրոջ պայծառակերպութիւնէն անուշահոտութիւն բուրեց, որմէ աշակերտները
թմրելով ինկան քունի ծանրութեան տակ: Վարդը քանի դեռ կոկոն է, ո՛չ իր գեղեցկութիւնը
և ո՛չ ալ իր անուշահոտութիւնը կը յայտնէ, իսկ ժամանակի լրանալուն պէս կը փթթի և իր գոյնով
ու անուշահոտութեամբ մարդոց կ'ուրախացնէ: Այսպէս ալ Քրիստոս կուսական արգանդին մէջ սնունդ
առաւ ու զարգացաւ որպէս կոկոն և ապա ծնանելով աստղի ու հրեշտակներու աւետիսով յայտնուեցաւ
մոգերուն ու հովիւներուն, իսկ հասնելով կատարեալ հասակին նշաններով ու սքանչելիքներով
յայտնուեցաւ բոլորին: Վարդավառը նաեւ հայոց ամենասիրուած, ամենաուրախ և յիշարժան տօներէն
մէկն է, որովհետեւ ըստ հնագոյն առասպելներուն` հեթանոսական շրջանին, այն նուիրուած էր
սիրոյ ու ջուրի հեթանոս աստուածուհի Աստղիկին, որ վարդաջրեր ցողելով և վարդեր նուիրելով,
սէր կը պարգեւէր մարդոց: