Візіт Папы на Лампедузу: у апошнюю хвіліну, першы афіцыйны, без сустрэч з палітыкамі
Францішак едзе на
Лампедузу, каб аплакваць памерлых, - сказаў асабісты сакратар Пантыфіка, кс. прэлат
Альфрэд Хуэрэб. Прысутнасць Папы, на яго думку, з’яўляецца жэстам, дэманструючым,
што апроч італьянскай Поўначы, дзе багатыя жывуць, адкрыта марнуючы багацці, ёсць
таксама і Поўдзень, куды прыбываюць эмігранты, кінуўшы ўсё, каб знайсці шчасце, але
сустракаюць смерць. Гэта паездка, арганізаваная ў “апошнюю хвіліну”, стане першым
афіцыйным візітам Францішка. Цікава, што аб сваім рашэнні наведаць Лампедузу Пантыфік
паведаміў непасрэдна мясцовага арцыбіскуп Франчэска Монтэнэгра, не карыстаючыся каналамі
Дзяржсакратарыяту. А ў праграме візіту не пазначаны сустрэчы з дзяржаўнымі органамі
або італьянскай біскупскай канферэнцыяй. Святы Айцец наведае Лампедузу 8 ліпеня. Ён
сустрэнецца з афрыканскімі бежанцамі і адправіць св. Імшу.
Святы Айцец хоча
нагадаць свету, што так шмат афрыканцаў – ахвяраў вайны і нелегальных эмігрантаў –
загінулі ў Міжземным моры, спрабуючы дабрацца да Еўропы праз Лампедузу. Гэта значны
жэст, які павінен мабілізаваць мясцовыя і міжнародныя інстытуты, абыякавыя да гэтых
марскіх трагедый, пракаментаваў візіт Святога Айца кардынал Антоніа Марыя Вэльё, старшыня
Папскай рады пастырства эмігрантаў і падарожнікаў.
Усяго два месяцы таму, Папа
заклікаў урады, заканадаўцаў і міжнародныя супольнасці да паляпшэння становішча бежанцаў,
шляхам прыняцця эфектыўных ініцыятыў, накіраваных на забеспячэнне абароны іх годнасці,
паляпшэння якасці іх жыцця і супрацьстаянне сучасным формам пераследу, прыгнёту і
рабства.
Ідэя наведвання Лампедузы ў Францішка ўзнікла пасля навіны аб нядаўнім
чарговым патапленні карабля з эмігрантамі. Выбар Лампедузы ў якасці першага падарожжа
пантыфікату кажа больш, чым любыя словы, напісала ватыканская “L’Osservatore Romano”.
Пробашч
Лампедузы у інтэрв’ю агенцтву “SIR” выказаў радасць мясцовай супольнасці папскім візітам.
“Мара споўнілася”, - сказаў кс. Стэфана Настазі. Ён паведаміў, што стадыён, на якім
адбудзецца набажэнства з Папам, можа змясціць ад 5 да 10 тыс. чалавек. Арцыбіскуп
Монтэнэгра ў сваю чаргу адзначыў, што візіт Святога Айца на Лампедузу дапаможа мясцовым
жыхарам “прачытаць гісторыю вачыма Бога”.