Ռուսիա Եւ Ֆրանսա Մտադիր Են Զէնքի Նախագծման, Արտադրման Եւ Վաճառքի Մարզին Մէջ Համագործակցիլ
Ռուսական ԻԹԱՐ-ԹԱՍՍ լրատու գործակալութիւնը կը հաղորդէ, որ Ռուսիոյ փոխվարչապետ Տմիթրի
Ռոկոզին հոկտեմբերին պիտի այցելէ Ֆրանսա, որպէսզի հանդիպումներ ունենայ ֆրանսական կառավարութեան
անդամներուն հետ` պատերազմական օդանաւերու մարզին մէջ համագործակցութեան նոր մօտեցումներ
ամրագրելու համար` միացեալ նախագծման, արտադրութեան եւ սպառազինութիւններու վաճառքին
ուղղութեամբ: «Ես մտադիր եմ այս տարուան հոկտեմբերին Ֆրանսա այցելել, որպէսզի մասնակցիմ
ռուսական ուղղաթիռակիր յածանաւի գործարկման: Այցելութիւնը նաեւ առիթ մը պիտի հանդիսանայ
կառավարութեան մէջ հանդիպումներ կատարելու համար` Ֆրանսայի հետ հետագայ միացեալ գործունէութեան
մասին», յայտարարած է Ռոկոզին: Ան նաեւ նշած է, որ այժմ Ռուսիան մտադիր է, համագործակցելով
ծովային զէնքերու մեծագոյն արտադրողին հետ, զինուորական արհեստագիտական համակարգէն անցում
կատարել զինուորական ճարտարագիտական համագործակցութեան: