Святы Айцец: твор мастацтва – гэта запрашэнне да разважання і малітвы

5 ліпеня ў Ватыкане, каля будынку Губернатарата, была адкрыта скульптура св. Міхала Арханёла, апекуна Паўсюднага Касцёла і Дзяржавы Ватыкан. На цырымоніі прысутнічалі Францішак і Бэнэдыкт XVI. Менавіта Папа на пенсіі падчас свайго пантыфікату зацвердзіў ініцыятыву ўстаноўкі манументу, аб чым нагадаў у сваёй прамове цяперашні Пантыфік. Ён адзначыў, што твор мастацтва, гэта не толькі прыгожая аздоба, але і “запрашэнне да разважання і малітвы”.

Св. Міхал змагаецца, каб аднавіць Боскае правасуддзе, абараняе народ Божы ад ворагаў, і, перш за ўсё, д’ябла. Новая скульптура, паводле Папы, будзе нагадваць, што зло пераможана, а збаўленне было дасягнута раз і назаўжды праз кроў Хрыста. Манумент з’яўляецца таксама напамінам, што ў сваім падарожжы праз жыццёвыя выпрабаванні чалавек не самотны, яго суправаджаюць і падтрымліваюць Божыя Анёлы. Давяраючы Дзяржаву Ватыкан св. Міхалу Арханёлу, мы просім абараніць нас ад злога і выкінуць яго, сказаў на заканчэнне Папа.

Аўтарам манументу з’яўляецца італьянскі скульптар Джузэпэ Антоніа Ламускіа, які выйграў міжнародны конкурс, абвешчаны Губернатаратам Дзяржавы Ватыкан, на лепшы праект фігуры св. Міхала Арханёла.