4 ліпеня ў Ватыкане
былі абвешчаны вынікі 2012-га фінансавага году. Ён быў завершаны для Святога Пасаду
з прафіцытам бюджэту ў 2.185.622 еўра. 2-3 ліпеня адбывалася пасяджэнне Рады кардыналаў
па вывучэнні арганізацыйных і эканамічных праблем Апостальскай Сталіцы пад старшынствам
кардынала Дзяржсакратара Тарчызіо Бэртонэ. 3 ліпеня асамблею наведаў Святы Айцец,
які правёў размовы з яе ўдзельнікамі, падкрэсліўшы сваю гатоўнасць працягваць рэгулярныя
сустрэчы з Радай кардыналаў.
Прыбытковы бюджэт у мінулым годзе быў асягнуты
дзякуючы добрай працы ў сектары фінансавага кіравання, адзначаецца ў афіцыйнай заяве
Святога Пасаду. Сярод самых складаных для рэгулявання аказалася сфера выдаткаў на
персанал, які на 31 снежня 2012 г. налічваў 2823 асоб, на сродкі масавай камунікацыі
і на выплату падаткаў на нерухомасць, якія павялічыліся на суму ў 5 млн. еўра ў параўнанні
з 2011 г.
Бюджэт Губернатарата Дзяржавы Ватыкан, незалежны ад бюджэту Святога
Пасаду, быў закрыты ў 2012 г. з прыбыткам у 23.079.800 еўра . Гэта на больш чым мільён
перавышае мінулагодні вынік.
У паведамленні гаворыцца таксама аб ахвяраваннях
у рамках так званага “Гроша св. Пятра”, матэрыяльнай дапамогі вернікаў на падтрымку
дабрачыннай дзейнасці Святога Айца. Яны паменшыліся з амаль 70 млн. амерыканскіх долараў
у 2011 г., да каля 65 млн. Таксама меншая сума была ахвяравана з боку касцёльных устаноў
на ўсім свеце на дзейнасць Рымскай курыі – 28.303.239 долараў, гэта на 11, 91% менш
за 2011 г. На 5,09% паменшыліся ўзносы з боку інстытутаў кансэкраванага жыцця, таварыстваў
апостальскага жыцця і фондаў. У цэлым адбылося зніжэнне на 7,45% усіх узносаў у параўнанні
з 2011 г.
Інстытут рэлігійных спраў – Ватыканскі банк – як і кожны год прызначыў
значную суму на падтрымку апостальскага служэння і дабрачыннай дзейнасці Папы. У 2012
г. яна склала 50 млн. еўра, 1,5 млн. з якіх было прызначана для Фонду св. Сяргея,
які дапамагае Касцёлу ў краінах былога СССР.
Рада кардыналаў заклікала да рэформы
фінансавай сістэмы і далейшага скарачэння выдаткаў за кошт спрашчэння і рацыяналізацыі
існуючых органаў, а таксама больш дасканалага праграмавання дзейнасці ўсіх ведамстваў.
Была выказана глыбокая падзяка за падтрымку, аказаную, часта ананімна, служэнню Святога
Айца, нягледзячы на цяперашні эканамічны крызіс.