Ужо заўтра, 5 ліпеня,
пачнуцца галоўныя ўрачыстасці ў гонар 400-годдзя прыбыцця ў Будслаў цудатворнай іконы
Божай Маці. У гэтым годзе свята будзе як ніколі маштабным – у невялікім мястэчку Будслаў
Мінскай вобласці чакаюць каля 50 тыс. пілігрымаў. Адны ідуць пешшу – як напрыклад
з Гродна, Нарачы і Мінска (больш за 300 чалавек са сталіцы ўжо крочаць чацвёрты дзень),
з Баранавічаў (па адлегласці гэтая самая доўгая пілігрымка). З Мінска вырушыла адмысловая
посная пілігрымка – на хлебе і вадзе.
Кожны з гэтых шляхоў быў пераадолены
ўжо не раз, а можа і не адзін дзесятак разоў – кожны год людзі з усёй краіны, а нават
з-за мяжы, сцякаюцца ў Будслаў, каб ушанаваць адзін з самых вядомых абразоў Беларусі.
Некотрыя абралі для сябе іншы – не менш цяжкі, але больш хуткі транспарт. Напярэданні,
3 ліпеня, 40 чалавек адправіліся ў Будслаў на роварах. Св. Імшу ў касцёле св. Сымона
і св. Алены ўзначаліў арцыбіскуп Тадэвуш Кандрусевіч, Мітрапаліт Мінска-Магілёўскі.
Ён пажадаў шчаслівага падарожжа і сам сеў на ровар, каб праехаць некаторы шлях разам
з вернікамі.
“Я думаю, калісьці прыйдзе час, што і на матацыклах паедзем таксама.
Людзі ездзілі ў пілігрымкі на розных відах транспарту – пешшу ходзяць, самалётамі
лётаюць, на цягніках ездзяць. А некаторыя абралі ровар. Чаму не? Тым больш, ведаеце,
што папа Францішак таксама едзіць на ровары. І калі я аб гэтым даведаўся, калі ўжо
кардынал Берголіа быў абраны Папай, то я яму паслаў здымак, калі мы ў мінулым годзе
паехалі ў пілігрымку на роварах”, - сказаў арцыбіскуп Кандрусевіч.
Нагадаем,
на ўрачыстасці ў Будслаў папа Францішак прызначыў свайго легата – у Беларусь прыедзе
кардынал Жан-Луі Таран. Ён узначаліць святочную Эўхарыстыю 6 ліпеня. А пілігрымку
на роварах благаславіў таксама і Апостальскі нунцый у Беларусі арцыбіскуп Клаўдыё
Гуджэроці, які сустрэў вернікаў прама каля сваёй рэзідэнцыі. Вернікі пераадолеюць
амаль 130 кіламетраў, каб зліцца з сапраўднай жывой ракой пілігрымаў, якая цячэ зараз
да цудатворнага абраза Маці Божай Будслаўскай.