Kek: dje, në Budapest, u hap Asambleja e përgjithshme kushtuar “Misionit në Evropën,
që ndryshon”
Arritën që dje, në Budapest, 230 delegatët, që marrin pjesë në asamblenë e Konferencës
së kishave evropiane (Kek), punimet e së cilës u hapën me një kremtim, përgatitur
nga Kishat hungareze e me fjalimin, mbajtur nga presidenti i Kek, metropoliti Emmanuel
Adamakis. Diskutimet, nisur dje, vijojnë. Sipas agjencisë Sir, e morën fjalën
kryeipeshkvi katolik i Budapestit e kryetar i Këshillit të Konferencave ipeshkvnore
të Evropës, kardinali Peter Erdë dhe sekretari i Këshillit Botëror të Kishave, i
nderuari Olav Tveit. “Nuk është detyra jonë t’i zgjidhim problemet e Evropës”, tha
metropoliti Adamakis gjatë konferencës së shtypit. Por, nëse ndryshojmë vetveten,
mund t’i japim fytyrë tjetër botës, që na rrethon”. “E tani, ç’pret? Kek dhe misioni
në Evropën, që ndryshon”, është titulli i punimeve të asamblistëve, që do të vijojnë
deri të hënën, më 8 korrik e që duhet të përfundojnë me rioganizimin e thellë të Kek”.
I nevojshëm, ky riorganizim, sepse kanë ndryshuar tashmë edhe rrethanat, në të cilat
u krijua, si në mjediset e shoqërisë, ashtu edhe të Kishës, në krahasim me vitin 1959,
kur lindi”, shpjegoi sekretari i përgjithshëm, Gi Liagrë. Ndërsa sipas pohimit
të metropolitit të patriarkanës ekumenike, “duhet reformuar një sistem i ndërlikuar
e duhet gjetur një mënyrë më e frytshme për bashkimin e Kishave e të njerëzve, përmes
Evropës”.