З 2007 г. колькасць
краін, якія выкарыстоўваюць абмежаванні ў дачыненні да членаў рэлігійных супольнасцяў
павялічылася са 147 да 160. Гэта вынікае з “Экуменічнага дакладу аб рэлігійнай свабодзе
хрысціян ва ўсім свеце”. Ахвярамі рэпрэсій становяцца галоўным чынам хрысціяне, але
не толькі, таксама сікхі, яўрэі, індусы, члены традыцыйных афрыканскіх і кітайскія
рэлігій. У дакладзе, апублікаваным на гэтым тыдні, даецца сумесная ацэнка сітуацыі
з рэлігійнай свабодай з боку нямецкага каталіцкага епіскапату і Рады Евангелічнай
Царквы Германіі. У ім падкрэсліваецца, што выкараненне рэлігійных пераследаў з’яўляецца
хрысціянскім абавязкам і павінна здзяйсняцца сумеснымі намаганнямі хрысціян усіх канфесій.
На
прэзентацыі дакументу эксперты па правах чалавека падкрэслівалі, што Блізкі Усход
і Паўночная Афрыка з’яўляюцца найбольш пацярпелымі рэгіёнамі з пункту гледжання абмежаванняў
свабоды рэлігіі з боку дзяржавы. Непакой аўтараў дакладу выклікае сітуацыя ва Усходняй
Еўропе, але і ў заходняй яе частцы ўсё часцей прымаюцца абмежавальныя для рэлігійнай
свабоды меры.
У 64 краінах існуюць вялікія або вельмі вялікія абмежаванні рэлігіі
праз дзеянні дзяржавы, вынікае з навуковага даследавання. Тут называюцца краіны з
вялікай колькасцю насельніцтва, такія як Кітай, Індыя і Расія, дзе каля 70% насельніцтва
падвяргаецца абмежаванням у моцнай ступені. У 157 краінах законы абмяжоўваюць свабоду
рэлігіі або зусім выключаюць яе. У 38 краінах дзяржава перашкаджае свабоднай змене
рэлігійнай прыналежнасці. У 77 краінах была зарэгістравана сацыяльная варожасць у
адносінах да вернікаў. Згодна з вынікамі даследавання, гэта асабліва небяспечна для
хрысціян, перш за ўсё, калі яны з’яўляюцца меншасцю ў той ці іншай краіне.