Shtëpia Botëuese e Vatikanit boton “I want you”, libër që i përgatit të rinjtë për DBR-në e Brazilit

“I want you (Dua ty) – Thirrja dhe misioni, aventura e të dymbëdhjetëve vazhdon”: ky është titulli i librit, publikuar nga Shtëpia Botuese e Vatikanit, për t’i përgatitur të rinjtë për Ditën Botërore të Rinisë, që do të mbahet në Rio-de-Zhanejro të Brazilit nga 23 deri më 28 korrik. Në vëllimin e shkruar nga italiania Maria Roza Poxho u thuhet të rinjve se misioni i Apostujve të Krishtit nuk ka përfunduar, por vazhdon me një aventurë të re. Ngjyrat e librit - e verdha, jeshilja dhe bluja – të kujtojnë ngjyrat e flamurit brazilian. Por të dëgjojmë vetë autoren në mikrofonin tonë:
Mendova ta organizoj këtë punë në mënyrë që të gjithë të rinjtë – nga 16 deri në 25 vjeç – të gjejnë diçka, që mund ta përdorin. Teksti është ndarë në seksione, me nivele të ndryshme, të cilat kërkojnë mënyra të ndryshme studimi e thellimi. Përshkruhen personazhet, konteksti historik e ka edhe pyetje, që u japin mundësinë të rinjve të mendojnë, të pyesin prindërit, të debatojnë me miqtë. Libri mund të lexohet edhe në familje e mund të zgjidhet pjesa më e përshtatshme për atë ditë, ose për atë rrethanë. Kështu prindërit punojnë me fëmijët e anasjelltas.
“I want you” (Dua ty) është edhe mjet për të kuptuar si mund të jemi apostuj në Mijëvjeçarin e Tretë…
Po, apostuj të Mijëvjeçarit të Tretë, sepse sot supozojmë gabimisht se kumtimin e Ungjillit të Krishtit duhet ta bëjë ndokush tjetër, duhet ta bëjnë të rriturit, meshtarët, murgeshat, ndokush që ka detyra të rëndësishme. Por, i krishteri – çdo i krishterë – është ai, që thirret për t’i mësuar të tjerët, për t’u bërë lajmëtar i Ungjillit aty ku jeton. Kjo është detyrë për të gjithë, por sidomos për të rinjtë. Ja pseja e titullit – dua ty, pikërisht ty e jo ndonjë tjetër – e kjo për të reflektuar mbi ftesën, që Jezusi i bën secilit, duke e veshur me përgjegjësinë e Ungjillit, që duhet kumtuar, për të shmangur shndërrimin e krishterimit në një mesazh të vagëllt moral, siç është bërë zakon nganjëherë. Të rinjtë duhet ta ndjejnë se janë të thirrur një për një.