Papa në festën e Shën Tomës: Hyji takohet duke puthur plagët e Jezusit
Për të takuar Hyjin e gjallë, duhet të puthim me dashuri të pamasë plagët e Jezusit
në vëllezërit tanë të uritur, të varfër, të sëmurë, të burgosur: këtë theksoi sot
paradite Papa Françesku gjatë Meshës, kremtuar në Shtëpinë e Shën Martës, në Vatikan,
duke komentuar Ungjillin e festës së Shën Tomës Apostull. Të pranishëm, meshtarë e
bashkëpunëtorë të Këshillit Papnor për Dialogun Ndërfetar, kryesuar nga kardinali
Zhan Lui Toran, kryetar i dikasterit. Kujtojmë se sot nuk u mbajt takimi i zakonshëm
i Papës me besimtarët. Audiencat e përgjithshme të së mërkurës do të rifillojnë
rregullisht nga e mërkura, 4 shtator. Ndërsa Ati i Shenjtë do të vijojë t’i prijë
lutjes mariane të Engjëllit të Tënzot në Vatikan.
Mbas ngjalljes, Jezusi
iu duk apostujve, por Toma nuk ndodhej aty. E Zoti deshi që ai të priste një javë,
shpjegoi Papa Françesku. Zoti i di mirë punët e veta. E i jep secilit nga ne kohën,
që atij i duket më e arsyeshme. Tomës i dha një javë kohë. E pas një jave, u riduk
me plagët e veta. Korpi i tij ishte krejt i pastër, mrekullisht i bukur, plot dritë.
Kështu e përshkroi Papa Zotin në atë ças, por plagët, shtoi, ishin aty, e janë akoma.
E kur Zoti do të vijë në mbarim të kohëve, do të na i tregojë plagët e veta, e edhe
ne do t’i shikojmë, si Toma. Si apostulli, që nuk besonte aq lehtë. Donte t’i prekte
me gisht plagët e Zotit: “Ishte kryeneç. Po Zoti deshi pikërisht një njeri kokëfortë,
për të na bërë të kuptojmë një gjë më të madhe. Toma e pa Zotin, e Ai e ftoi t’i prekte
me gisht plagët e gozhdave e të vinte dorën në plagën e kraharorit. Apostulli i vuri,
por nuk tha: ‘Është e vërtetë, Zotit u ngjall!’. Jo! Shkoi edhe më përtej. Tha: ‘Hyji
im!’. Duke u bërë kështu i pari apostull, që dëshmonte hyjninë e Krishtit, pas Ngjalljes.
Tha kështu, dhe e adhuroi”. E kështu, vijoi Papa, kuptohet edhe cili ishte
ndjeti i Zotit, që e bëri të priste: ta përdorte mosbesimin e tij jo për të pohuar
ngjalljen, por natyrën e Tij hyjnore. Udha për takimin me Jezusin-Zot, nënvizoi Papa,
janët plagët e Tij. S’ka asnjë rrugë tjetër: “Në historinë e Kishës nuk munguan
gabimet në përpjekjen për të gjetur udhën drejt Zotit. Disa besuan se Hyjin e gjallë,
Hyjin e të krishterëve, nuk mund ta gjejmë përmes udhës së meditimit e se duhet shkuar
më lart sesa meditimi. Kjo është e rrezikshme, eh? Sa humbasin në këtë udhë e nuk
e arrijnë kurrë cakun! Arrijnë, sigurisht, në njohjen e Hyjit, po jo të Jezu Krishtit,
Birit të Hyjit, Vetjes së tretë të Trinisë. Tek Krishti nuk arrijnë. E kjo është udha
e gnostikëve, apo jo? Njerëz të mirë, që punojnë, por që nuk janë në rrugë të drejtë.
Rruga e tyre është tejet e ndërlikuar e nuk të çon në limanin e mirë”. Të tjerë,
shpjegoi Papa, menduan se për të arritur tek Zoti, njeriu duhet ta mundojë veten,
të jetë i përkorë. Zgjodhën, prandaj, rrugën e pendesës: vetëm pendesë e agjërim.
E as këta nuk arritën tek Hyji i gjallë, Jezu Krishti. Janë pelagjianët, që besojnë
se mund të arrihet tek Zoti vetëm me përpjekjet vetjake. Po Jezusi na kujton se udha,
që duhet bërë për ta takuar, është ajo e plagëve të tij: “E plagët e Jezusit
ti i gjen duke bërë vepra mëshire, duke iu kushtuar korpit - korpit- e edhe shpirtit,
po kryesisht korpit – e nënvizoj, të vëllait tënd të plagosur, sepse ka uri, sepse
ka etje, sepse është i zhveshur, sepse është i përbuzur, sepse është skllav, sepse
është në burg. sepse është në spital. Këto janë plagët e Jezusit sot. E Jezusi na
kërkon të bëjmë një akt feje. T’ia bëjmë Atij, por përmes këtyre plagëve. ‘Ah, mrekullisht
mirë! Të themelojmë një fondacion për t’i ndihmuar këta njerëz e të bëjmë, kështu,
shumë punë të mira për t’i ndihmuar’. Kjo është e rëndësishme, por në se mbetemi në
këtë plan, do të jemi vetëm filantropë. Duhet t’i prekim plagët e Jezusit, duhet t’i
ledhatojmë plagët e Zotit, duhet t’i mjekojmë plagët e Krishtit me dashuri, duhet
t’ia puthim plagët, e këtë duhet ta bëjmë drejtpërdrejt. Të mendojmë ç’i ndodhi Shën
Françeskut, kur puthi të gërbulurin! E njëjta gjë, edhe Tomës. Jeta e tyre u shndërrua!”.Për
ta prekur Hyjin e gjallë, pohoi Papa, nuk duhet bërë ndonjë kurs përditësimi, por
duhet hyrë në plagët e Jezusit. E për këtë, mjafton të dalësh në rrugë. T’i kërkojmë
Shën Tomës, përfundoi Ati i Shenjtë, të ndërmjetësojë që të kemi guximin për të hyrë
në plagët e Jezusit me dhembshurinë tonë e, sigurisht, do të kemi hirin të adhurojmë
Hyjin e gjallë.