Кардынал: існаванне беднасці – пытанне не эканамічнага, а маральнага характару
Будаваць свет больш
справядлівы і раўнапраўны, які рацыянальна і ўстойліва карыстаецца рэсурсамі, лепш
размяркоўвае прадукты харчавання, прымае дальнабачныя рашэнні для змякчэння наступстваў
змены клімату і яго разбуральных эфектаў для тэрыторый, закранутых беднасцю, заклікаў
старшыня Папская рады па інтэрпрэтацыі заканадаўчых тэкстаў. Кардынал Франчэска Кокапальмерыа
адкрыў 1 ліпеня семінар высокага ўзроўню ў сядзібе Папскай акадэміі навук у Ватыкане
на тэму “Беднасць, грамадскія даброты і ўстойлівае развіццё. Глабальныя выклікі новага
тысячагоддзя”.
“Беднасць з’яўляецца адной з самых вялікіх праблем новага тысячагоддзя”,
- сказаў ватыканскі кардынал. Ён лічыць, што ў свеце існуе шмат прыгожых жаданняў,
праграм, фармальных абавязацельстваў арганізацый і краін, якія застаюцца толькі на
стадыі імкненняў. А беднасць ставіць перад чалавецтвам пытанні сацыяльнага, эканамічнага,
грамадскага, і, не ў апошнюю чаргу, маральнага характару. Пурпурат нагадаў, што папа
Францішак з самага пачатку свайго пантыфікату акцэнтуе “скандальнасць” існавання беднасці
ў свеце. Яна, на думку Святога Айца, з’яўляецца выклікам для ўсяго Касцёла.
“Цвярозасць
і ўменне прыслухоўвацца да патрэбаў менш паспяховых павінны быць кіруючымі прынцыпамі
паводзінаў хрысціян”, - лічыць кардынал Кокапальмерыа. Ён падкрэсліў, што сёння тэма
беднасці пераплятаецца з іншымі ўзаемазлучанымі тэмамі: клопатам аб навакольным асяроддзі,
развіццём гарадоў, развіццём энергетыкі, эканамічным ростам, для якіх павінны быць
выпрацаваны новыя крытэрыі, паколькі старыя аказаліся не эфектыўнымі.