8 ліпеня папа Францішак
наведае італьянскі востраў Лампедузу, паінфармавала сёння Зала Друку Апостальскай
Сталіцы. На ім прабывае шмат эмігрантаў, якія шукаюць прытулку ў Італіі і Еўропе.
У спецыяльным паведамленні адзначаецца, што Францішак узначаліць св. Імшу на мясцовым
стадыёне і сустрэнецца з уцекачамі і жыхарамі вострава. Папа глыбока занепакоены нядаўняй
трагедыяй імігрантаў з Афрыкі, якія, шукаючы лепшай будучыні, загінулі ў выніку аварыі
на Міжземным моры не даплыўшы да Лампедузы. “Святы Айцец жадае памаліцца за тых, хто
страціў жыццё ў моры, наведаць тых, хто выжыў і прысутных на востраве ўцекачоў, а
таксама падтрымаць мясцовых жыхароў і заклікаць іх да яшчэ большага клопату пра тых
братоў, якія апынуліся ў вялікай патрэбе”, - адзначаецца ў паведамленні. Візіт Папы
з-за асаблівасці абставін будзе мець вельмі сціплы характар. Ён з’яўляецца прыкметай
клопату Папы да бедных і найбольш патрабуючых і яго жаданнем прыцягнуць увагу міжнароднай
супольнасці да праблем эміграцыі.