Միացեալ Նահանգներու Ծերակոյտը Որդեգրեց Ներգաղթեալներու Մասին Օրինագիծը
Միացեալ Նահանգներու Ծերակոյտը որդեգրեց դեմոկրատականներու եւ հանրապետականներու համար
ներքաղաքական կարեւոր առաջնահերթութիւն նկատուող ներգաղթի բարեփոխումներու մասին օրինագիծը: «ՌԻԱ
Նովոսթի» լրատու գործակալութիւնը կը նշէ, որ ասիկա 1980-ական թուականներէն ի վեր ներգաղթի
վերաբերող օրէնսդրութեան մեծագոյն վերանայումն է: Այժմ օրինագիծը պիտի ուղարկուի Ներկայացուցիչներու
տուն, հակառակ անոր որ Ներկայացուցիչներու տան նախագահ Ճոն Պոյնըր արդէն յայտարարած
է, որ պիտի փորձէ բարեփոխումներու սեփական տարբերակ մը մշակել: Ծերակոյտի հաւանութեան
արժանացած օրինագիծը թոյլ կու տայ 11 միլիոն ապօրինի ներգաղթեալներու 13 տարուան ընթացքին
Միացեալ Նահանգներու քաղաքացիութիւն ստանալ, եթէ այդ ընթացքին անոնք վճարեն տուգանքներն
ու տուրքերը եւ չխախտեն երկրին օրէնքները: Միաժամանակ, օրինագիծը կ՛ենթադրէ 46 միլիառ
տոլարի յատկացում սահմաններու պաշտպանութեան, սահմանային հսկողութեան համակարգին եւ աշխատատեղիի
ելեկտրոնային ստուգման համար: Օրինագիծը վաւերացուած է 68 թեր եւ 32 դէմ քուէներով: