Папа: у праваслаўных можна павучыцца калегіяльнасці
“Жэстам вытанчанай
увагі” назваў Пантыфік прысутнасць Патрыярха Барталамея І на яго інаўгурацыі. Францішак
сустрэўся 28 чэрвеня з дэлегацыяй Канстантынопальскага Патрыярхату, якая прыбыла ў
Ватыкан на ўрачыстасць святых Пятра і Паўла. “Ваша прысутнасць у гэтых абставінах
з’яўляецца прыкметай глыбокай сувязі, якая аб’ядноўвае, у веры, надзеі і любові, Канстантынопальскую
Царкву і Рымскі Касцёл”, - сказаў Святы Айцец. Традыцыя абмену дэлегацыямі на вялікія
ўрачыстаці, якая пачалася ў 1969 г., з’яўляецца, паводле Папы, “важнай часткай шляху
да адзінства”. Пошук еднасці паміж хрысціянамі, гэта неабходнасць, сёння большая,
чым калі-небудзь, гэтага проста не можна пазбегнуць, перакананы Пантыфік. “Наш свет
мае голад і смагу праўды, любові, надзеі, міру і адзінства, гэта важна для нашага
сведчання, каб, нарэшце, абвесціць адзіным голасам добрую навіну Евангелля і цэлебраваць
разам Боскія Таямніцы новага жыцця ў Хрысце!”, - сказаў Папа. Адзінства, гэта, без
сумневу, дар Божы, дадаў Святы Айцец, але ў кожнага з хрысціян ёсць задача “рыхтаваць
умовы, культываваць глебу сэрца, каб гэта надзвычайная ласка была прынята”.
Францішак
адзначыў дзейнасць Змешанай міжнароднай камісіі па тэалагічным дыялогу паміж Рыма-каталіцкім
Касцёлам і Праваслаўнымі Цэрквамі. Менавіта яна, на думку Папы, робіць фундаментальны
ўклад у пошук поўнага адзінства паміж католікамі і праваслаўнымі. Гэта камісія ўжо
распрацавала шмат агульных тэкстаў і цяпер вывучае далікатнае пытанне тэалагічных
і эклезіялагічных адносін паміж прыматам і сінадальнасцю ў жыцці Касцёла.
Паводле
Папы, сёння трэба весці дыялог па гэтых пытаннях у праўдзе і любові, “пачынаючы з
таго, што ў нас ёсць агульнага, але не хаваючы таго, што па-ранейшаму аддзяляе нас”.
Тут важны не чыста тэарэтычны ўзровень, але і вывучэнне традыцый адзін аднаго, каб
зразумець, а часам і чамусьці павучыцца. На думку Святога Айца, такім прыкладам для
католікаў можа быць традыцыя калегіяльнасці, характэрная для Праваслаўных Цэркваў.
Каталіцкі Касцёл і Праваслаўныя Цэрквы аб’ядноўвае “адна і тая ж канцэпцыя дыялогу”,
заснаваная на паглыбленні адзінай ісціны, што Хрыстус даў свайму Касцёлу, перакананы
Францішак. “Таму, мы не павінны баяцца сустрэчы і сапраўднага дыялогу. Гэта не аддаліць
нас ад ісціны, а, хутчэй, праз абмен дарамі, прывядзе нас, пад кіраўніцтвам Духа праўды,
да поўні праўды”, - сказаў Папа.
Пантыфік папрасіў членаў праваслаўнай дэлегацыі
маліцца за яго, каб Бог дапамог яму ў служэнні Біскупа Рыма і Наступніка св. Пятра.