Թուրքիոյ Մէջ Միացեալ Նահանգներու Դեսպանը Այցելած Է Աղթամարի Ս. Խաչ Եկեղեցի
Թրքական «Միլլիյէթ» օրաթերթը կը հաղորդէ, որ Թուրքիոյ մէջ Միացեալ Նահանգներու դեսպան
Ֆրանսիս Ռիքարտոնէ իր կնոջ հետ այցելած է Վան եւ Աղթամար կղզիի Ս. Խաչ եկեղեցի: Ան
յայտարարած է, որ Վանի մէջ ջերմ ընդունելութեան արժանացած է: «Վանի հետ կապուած գեղեցիկ
յիշատակներ ունիմ: Անիկա այժմ շատ փոխուած է: Ժամանակ մը շրջագայած եմ այստեղ եւ կը փափաքէի
Վանայ կատու գնել», պատմած է դեսպանը: Ան նշած է, որ իրենք կ՛ուզեն մեծցնել Վանի նկատմամբ
ամերիկացի զբօսաշրջիկներուն հետաքրքրութիւնը: «Վաղը ամերիկացիներ Ֆլորիտայէն Վան պիտի
գան: Ուզեցի խրախուսել մեր քաղաքացիները», ըսած է դեսպանը: Վանի նահանգապետ Մունիր
Քարաօղլու դեսպան Ռիքարտոնէին եւ անոր կնոջ Ս. Խաչ եկեղեցւոյ պատկերով գեղանկար նուիրած
է: