Кс. Ламбардзі: Папа не мае ніякіх праблем са здароўем
У Ватыкане абверглі
чуткі пра стан здароўя Пантыфіка пасля адмены яго ўдзелу ў канцэрце 22 чэрвеня. Няма
прычын для непакою адносна здароўя Папы, сказаў кс. Фэдэрыка Ламбардзі, кіраўнік Залы
Друку Апостальскай сталіцы у суботу вечарам. Перад канцэртам, які прадставіў у Ватыкане
Нацыянальны сімфанічны аркестр італьянскага радыё і тэлебачання “RAI” пад кіраўніцтвам
славацкага дырыжора Юрая Вальчугі, было паведамлена, што папа Францішак не можа прысутнічаць
на ім з-за некаторых прыярытэтных службовых абавязкаў.
Першапачаткова інфармавалася
аб прысутнасці Святога Айца на выкананні Дзевятай сімфоніі Бетховена. Арганізатарам
мерапрыемства была Паская рада па новай евангелізацыі, а праходзіў канцэрт у рамках
“Года веры”. Кіраўнік ватыканскай дыкастэрыі, арцыбіскуп Рына Фізікела, прачытаў перад
пачаткам канцэрту кароткае паведамленне ад імя Святога Айца. У ім Пантыфік падзякаваў
“усім тым, хто зрабіў магчымым і хто арганізаваў канцэрт у “Год веры”. Ён назваў сімфонію
Бетховена “манументальнай”. Гэты твор, на думку Папы, “не толькі дазваляе перажываць
моманты задумы і ўзвышэння душы, але выклікае ва ўсіх пачуцці і эмоцыі, якія вядуць
нас да разважання”.
Кс. Ламбардзі паведаміў, што ўчарашняя адсутнасць Пантыфіка
не паўплывае на праграму яго ўдзелу ў наступных мерапрыемствах. Францішак правядзе
ўсе запланаваныя сустрэчы, паведаміў святар.