Հայաստան Ստանձնեց Սեւծովեան Տնտեսական Համագործակցութեան Կազմակերպութեան Նախագահութիւնը
Օտեսայի մէջ երէկ տեղի ունեցած է Սեւծովեան տնտեսական համագործակցութեան կազմակերպութեան
անդամ երկիրներու արտաքին գործոց նախարարներու խորհուրդի 28-րդ հանդիպումը, որուն ժամանակ
Հայաստանի արտաքին գործոց նախարար Էդուարդ Նալբանդեան վեց ամիս ժամկէտով` մինչեւ 31 դեկտեմբեր
ստանձնած է կազմակերպութեան նախագահութիւնը: Նախարարական հանդիպման ընթացքին իր ելոյթին
մէջ Հայաստանի արտաքին գործոց նախարարը նշած է, որ Սեւծովեան տնտեսական համագործակցութեան
կազմակերպութիւնը կը թեւակոխէ իր գործունէութեան 22-րդ տարին` տնտեսական համագործակցութեան
նոր օրակարգով: Նախարար Նալբանդեան արձանագրած է, որ Հայաստան գործուն քայլեր կ’իրականացնէ
կազմակերպութեան նոր օրակարգը կեանքի կոչելու եւ շրջանին մէջ փոխշահաւէտ համագործակցութիւնը
խթանելու ուղղութեամբ: Անդրադառնալով Սեւծովեան տնտեսական համագործակցութեան կազմակերպութեան
արդիւնաւէտութեան բարձրացման հարցին` Հայաստանի արտաքին գործոց նախարարը առանձնացուցած
է Սեւծովեան տնտեսական համագործակցութեան կազմակերպութեան ծիրին մէջ ընդունուած փաստաթուղթերու
դրոյթներու պատշաճ կատարումը, ինչպէս նաեւ կազմակերպութեան աշխատանքային խումբերու օրակարգերու
արդիականացման անհրաժեշտութիւնը: Նախարարը կարեւոր նկատած է միջազգային կազմակերպութիւններու,
Սեւծովեան տնտեսական համագործակցութեան կազմակերպութեան յարակից մարմիններու, դէտերու
եւ բնագաւառային երկխօսութեան գործընկերներու հետ համագործակցութեան զարգացման, կազմակերպութեան
քարտուղարութեան բարեփոխումներու եւ հաւասար ներկայացուածութեան սկզբունքի կիրառման անհրաժեշտութիւնը: Հանդիպման
իբրեւ արդիւնք Սեւծովեան տնտեսական համագործակցութեան կազմակերպութեան արտաքին գործոց
նախարարներուն կողմէ ընդունուած են կազմակերպութեան գործունէութեան առնչուող շարք մը
որոշումներ: Ստանձնելով Սեւծովեան տնտեսական համագործակցութեան կազմակերպութեան նախագահութիւնը`
նախարարը Նալբանդեան շեշտած է, որ Հայաստանը կարեւոր կը նկատէ սեւծովեան շրջանին մէջ
տնտեսական համագործակցութեան խթանման ուղղութեամբ յաւելեալ ջանքերու ներդրումը, կազմակերպութեան
գործունէութեան արդիւնաւէտութեան բարձրացումը եւ միջազգային բեմահարթակի վրայ անոր հեղինակութեան
ամրապնդումը: