Imzot Çullikat në OKB: papunësia është padrejtësi shoqërore, që minon lirinë
“Turp kolektiv për qeveritë, krerët e botës, bashkësinë ndërkombëtare”: kështu e quajti
Vëzhguesi i përhershëm i Selisë së Shenjtë në OKB, imzot Frensis Çullikat, pamundësinë
për të vazhduar shkollën, plagë për 250 milion fëmijë në botë. Prelati foli javën
e kaluar në Nju Jork para Asamblesë së përgjithshme të Kombeve të Bashkuara, duke
denoncuar ashpër edhe papunësinë, “vuajtje e madhe e kohës sonë”, si edhe shfrytëzimin
në punë deri në skllavëri të vërtetë. 400 milion punëtorë – këto janë statistikat
– jetojnë në varfëri të skajshme, 10 milion fëmijë shfrytëzohen si skllevër pune thjesht
për të shtuar mirëqënien dhe rehatinë e perëndimorëve. E 250 milion fëmijët, që nuk
dinë shkrim e këndim, pyeti me zemërim imzot Çullikat, si do të mund të ecin në një
hap me kohën? Prandaj, Vëzhguesi i Selisë së Shenjtë kërkoi politika për t’u siguruar
punë dinjitoze të gjithëve, kërkoi bashkëpunim ndërkombëtar për të vënë para përgjegjësisë
qeveritë e shoqëritë, që thyejnë pa turp normat e Konventës së OKB-së për të drejtat
e fëmijëve. Nëse nga njëra anë, puna është e drejtë themelore e njeriut, theksoi imzot
Çullikat, nga ana tjetër, shfrytëzimi i fëmijëve për punë, pa i lënë të shkollohen,
nuk u jep atyre mundësinë të integrohen si duhet në shoqëri e as t’u përshtaten ndryshimeve
në ambientin e punës. Në shkollimin dhe edukimin e fëmijëve, vazhdoi më tej prelati,
rol kryesor luan familja dhe solidariteti ndërmjet brezave, për t’i ndihmuar të rinjtë
të bëhen qytetarë të shëndoshë, të aftë të prodhojnë e të marrin përsipër përgjegjësitë
e së ardhmes. Këto janë vlera, theksoi imzot Çullikat, e vlerat kalojnë së pari, përmes
familjes. Prandaj, kërkoi Vëzhguesi i Selisë së Shenjtë, është me rëndësi të jashtëzakonshme,
që politika të respektojë e të mbrojë rolin themelor të familjes.