"Відэакатэхізіс Каталіцкага Касцёла" на заканчэнне Года веры
Распаўсюджваць і тлумачыць
навучанне Касцёла, а таксама знаёміць з прыгажосцю хрысціянскай веры, з дапамогай
сучаснай мовы і знакаў – гэта мэта “Відэакатэхізіса Каталіцкага Касцёла” прэзентацыя
якога пройдзе ў Ватыкане 28 чэрвеня. Ён быў падрыхтаваны рэжысёрам Гіёнам Колндрэкаем
і выпушчаны кампаніяй “Grossin Media Group” у супрацоўніцтве з Ватыканскім выдавецтвам.
Праект уключае ў сябе 2500 хвілін відэаматэрыялаў высокай якасці, падзеленых на 70
раздзелаў Катэхізіса Каталіцкага Касцёла (кожны працягласцю ў 30 хвілін) і 70 сегментаў
Кампендыя Катэхізіса Каталіцкага Касцёла (кожны працягласцю ў 10 хвілін). Увесь “Відэакатэхізіс”
будзе выдадзены ў чатырох частках.
У кожным з раздзелаў, пра веру будуць распавядаць
звычайныя людзі, а таксама сусветна вядомыя дзеячы культуры, навукі, мастацтва, кіно,
музыкі, спорта, свету эканомікі і фінансаў. Яны пазнаёмяць гледачоў “Відэакатэхізіса”
з часткамі гэтага важнага дакумента і раскажуць чаму вераць у Бога. Праект запланаваны
як шматмоўны.
Замовіць “Відэакатэхізіс Каталіцкага Касцёла” можна будзе з верасня
2013 г. а з’явіцца ён на заканчэнне Года веры, ў лістападзе 2013 г.