Ցուցարարներուն Դէմ Անհամաչափ Ուժի Կիրարկման Պատճառով. Գերմանիա Եւ Հոլանտա Թուրքիոյ`
Եւրոպական Միութեան Անդամակցութեան Բանակցութիւնները Վեթոյի Կ՛ենթարկեն
Աւելի քան երկու շաբաթ տեւած հակակառավարական ցոյցերու թատերաբեմ դառնալէ ետք, Պոլսոյ
Թաքսիմ հրապարակին վրայ կեանքը սկսաւ վերագտնել իր բնական հունը, սակայն Անգարայի եւ
Էսքիշեհիրի մէջ երեքշաբթի գիշեր ոստիկանութեան եւ ցուցարարներուն միջեւ բախումներ արձանագրուեցան:
Ոստիկանութիւնը ցուցարարները ցրուելու համար ջրաշիթ մեքենաներ եւ արցունքաբեր կազ օգտագործեց:Թաքսիմի միասնականութիւն խմբակը, որ կազմուած է Թաքսիմի ցոյցերուն մասնակից իրաւապաշտպան խմբակներէ եւ քաղաքացիական հասարակութեան կազմակերպութիւններէ, հաղորդագրութիւն մը հրապարակելով յայտնեց, որ Թաքսիմի հրապարակին վրայ ցոյցերուն աւարտէն ետք ցուցարարներու ձերբակալման շարունակումը կը նմանի կախարդներու հալածանքի մը եւ ժողովրդավարութեան վնաս կը պատճառէ: Կազմակերպութիւնը պահանջեց անմիջապէս դադրեցնել ձերբակալման արշաւը եւ ազատ արձակել ձերբակալուած ցուցարարները` յայտնելով, որ ամբողջ երկրին տարածքին ընթացող ձերբակալումները Թուրքիոյ մէջ երկարատեւ պետական աւանդութեան մը ուրուականը կը վերակենդանացնեն:
Խմբակը կառավարութեան կոչ ուղղեց ցոյցերուն նկատմամբ իր մօտեցումը փոխելու եւ քաղաքացիներուն քաղաքային ցոյց կատարելու իրաւունքը յարգելու:
| All the contents on this site are copyrighted ©. |