«Ասատ Օրինականութեան Չի Կրնար Վերատիրանալ» Կ՛ըսէ Օպամա

Միացեալ Նահանգներու նախագահ Պարաք Օպամա շեշտեց, որ «պէտք է Սուրիոյ մէջ փոխանցման կառավարութիւն մը գոյութիւն ունենայ»` նշելով, որ «մենք սուրիական տագնապի քաղաքական լուծման վրայ կը պնդենք»:
Օպամա յայտնեց, որ «Սուրիոյ նախագահ Պաշշար Ասատ Սուրիոյ մէջ հարիւր հազար զոհ արձանագրուելէն ետք կը ջանայ օրինականութեան տիրանալ»` աւելցնելով, որ «Ասատ քաոս ու արիւնահեղութիւն պատճառեց եւ չի կրնար օրինականութեան վերատիրանալ»:
Ան Գերմանիոյ վարչապետ Անկելա Մերքելի հետ միացեալ մամլոյ ասուլիսի մը ընթացքին ըսաւ, որ սուրիական ընդդիմութեան մատուցուելիք օժանդակութեան մասին մանրամասնութիւններ պիտի չփոխանցէ, «սակայն մեր քաղաքականութիւնը յստակութեամբ կը բնորոշուի»` նշելով, որ «մենք կ՛ուզենք արիւնահեղութեան վերջ տալ եւ վստահ ըլլալ, որ քիմիական զէնք պիտի չօգտագործուի եւ պիտի չիյնայ ձեռքերուն մէջ կողմի մը, որ զայն օգտագործէ»: