Papa Françesku për FAO-n: uria është shkandull, të mos spekullohet me çmimin e ushqimeve
Edhe sot, ka miliona njerëz, që vdesin nga uria: shkandull i vërtetë. E kemi dëgjuar
shpesh këtë pohim, por kësaj radhe vjen nga goja e Papës Françesku, i cili, sot paradite,
priti në Vatikan pjesëmarrësit e Konferencës së FAO-s, Organizatës së OKB-së për Bujqësinë
e Ushqimin. Jeni këtu, u tha Ipeshkvi i Romës, për t’i dhënë përgjigje nevojës
parësore të shumë vëllezërve e motrave, asaj të bukës së përditshme, në një botë të
përshkuar nga kriza ekonomike, konfliktet, ndryshimet e klimës, problemet e ambientit.
Të gjithë duhet të përfitojnë njësoj nga frytet e Tokës, nënvizoi Ati i Shenjtë, e
kjo, jo vetëm sepse duhet zvogëluar dallimi ndërmjet atyre që kanë e atyre që s’kanë,
por sepse është sidomos kërkesë e drejtësisë, barazisë e respektit për çdo njeri: “Njeriu
dhe dinjiteti njerëzor, ka rrezik të kthehen në abstraksion përballë çështjeve si
përdorimi i forcës, lufta, mungesa e ushqimit, mënjanimi, dhunimi i lirive themelore
e spekullimi financiar, që në këtë çast, kushtëzon çmimin e ushqimeve, trajtuar si
çdo mall tjetër, duke harruar destinacionin parësor”. Vërtet, vazhdoi Papa
Françesku, përjetojmë një krizë bindjesh e vlerash, duke përfshirë edhe ato, që përbëjnë
bazën e jetës ndërkombëtare: “…është e nevojshme t’i kundërshtojmë interesat
dritëshkurtra ekonomike dhe logjikën e pushtetit të pak vetëve, të cilët e përjashtojnë
popullsinë botërore dhe shkaktojnë varfëri e mënjanim, me efekte shkatërrimtare mbi
shoqërinë. Gjithashtu, duhet të luftojmë korrupsionin, që sjell privilegje për disa
e padrejtësi për më të shumtit”. Nuk është puna thjesht për të pasur mëshirë,
theksoi Ati i Shenjtë, e nuk është as ftesë për të ndarë pasurinë me të tjerët, apo
për të favorizuar pajtimin ndërmjet njerëzve: “Do të thotë të jemi gati, të
vendosim ne vetë, për të ndarë çdo gjë e për të qenë samaritanë të mirë, e jo njerëz
indiferentë ndaj nevojave të të tjerëve. …FAO-s, shteteve anëtare dhe bashkësisë ndërkombëtare,
u kërkohet ta hapin zemrën.” Në fund, Papa Françesku i nxiti drejtuesit e organizatës
së OKB-së të vazhdojnë reformën për të garantuar një administrim më të mirë, më funksional
e më transparent të FAO-s dhe lavdëroi vendimin e tyre për t’ia kushtuar vitin e ardhshëm
“familjes fshatare”.