«ՌԻԱ Նովոսթի» կը հաղորդէ, որ Ռուսիոյ նախագահ Վլատիմիր Փութինի եւ Միացեալ Նահանգներու
նախագահ Պարաք Օպամայի միջեւ հանդիպումը, որ պէտք էր մէկ ժամ տեւէր, աւարտած է 1 ժամ
50 վայրկեան ետք: Հանդիպումին ընթացքին քննարկուած են միջազգային իրադարձութեանց առնչուող
հարցեր, մասնաւորաբար` Իրանի մէջ կատարուած նախագահական ընտրութիւնները: Փութին յոյս
յայտնած է, որ Իրանի նորընտիր նախագահ Հասան Ռուհանին պիտի նպաստէ հիւլէական ծրագիրի
լուծման: Իսկ Օպամա նշած է, որ իր երկիրը նոյնպէս դրական կը գնահատէ ընտրութիւնները`
յոյս ունենալով, որ նոր նախագահը վերսկսի խնդիրի լուծման շուրջ բանակցութիւններուն: Բանակցութիւններուն
երկրորդ կարեւոր նիւթը կը վերաբերէր Սուրիոյ: Փութին եւ Օպամա համաձայնած են, որ տագնապին
կողմերը պէտք է անպայման մասնակցին Ժընեւի մէջ տեղի ունենալիք խորհրդաժողովին: Նախագահները
ընդգծած են, որ տարբեր կարծիք ունին Սուրիոյ տագնապին վերաբերեալ, սակայն կ՛ուզեն վերջ
դնել բռնարարքներուն: