Ութերու Խմբակը «Ժընեւ-2»-ի Կարելի
Եղածին Չափ Շուտ Գումարումը Կը Պահանջէ
Ութերու խմբակի անդամ երկիրները երէկ իրենց ժողովի աւարտին յայտարարեցին, որ «մենք վճռակամ
ենք միասնաբար գործելու` Սուրիոյ մէջ արիւնահեղութիւնը դադրեցնելու համար»: Անոնք Սուրիոյ
մէջ ահաբեկչութեան եւ ծայրայեղութեան վտանգին առնչութեամբ «խոր մտահոգութիւն» յայտնեցին
եւ պահանջեցին Սուրիոյ շուրջ «Ժընեւ-2» խորհրդաժողովը կարելի եղածին չափ շուտ գումարել:«Ռոյթըրզ» լրատու գործակալութիւնը մատնանշեց, որ Ութերու խմբակի հաղորդագրութիւնը Սուրիոյ նախագահ Պաշշար Ասատի իշխանութենէն հեռացման վերաբերեալ ակնարկ չի բովանդակեր:
Ռուսիոյ արտաքին գործոց նախարար Սերկէյ Լաւրով քուէյթեան ՔՈՆԱ լրատու գործակալութեան հետ ունեցած հարցազրոյցի մը ընթացքին յայտնեց, որ «Ժընեւ-2» միջազգային խորհրդաժողովը սուրիական վարչակարգի տապալումը չի նշանակեր` նշելով, որ սուրիական ընդդիմութիւնը պէտք չէ խաղաղութեան խորհրդաժողովին նախապայմաններ ճշդէ:
Լաւրով ընդգծեց, որ «Սուրիոյ մէջ թռիչքներու արգիլեալ գօտի եւ «մարդասիրական միջանցքներ» ստեղծելու կոչերը «Ժընեւ-2» խորհրդաժողովի գումարման չեն նպաստեր»:
| All the contents on this site are copyrighted ©. |