Shën Jozefi shtohet në Lutjet eukaristike II, III dhe IV të Mesharit Romak
Me një Dekret të Kongregatës për Kultin Hyjnor dhe Disiplinën e Sakramenteve, që mban
datën e 1 majit, por u bë i njohur sot, Shën Jozefi, fati i Shën Marisë, shtohet në
Lutjet eukaristike II, III dhe IV të edicionit të tretë tipik të Mesharit Romak, ashtu
siç përmendet edhe në Kanunin Romak. Pra, në këto lutje, krahas emrit të Marisë, do
të thuhet “…edhe me Shën Jozefin, fatin e saj”. Vendimi, shpjegohet në dekret, u mor
nga Benedikti XVI, pas letrave e kërkesave të shumta, mbërritur në tryezën e Atit
të Shenjtë, dhe u konfirmua nga Papa Françesku. Kujtojmë se devocioni për shën Jozefin
është shtuar në Kanunin Romak nga Papa Gjoni XXIII, gjatë Koncilit II Ekumenik të
Vatikanit. “Përmes kujdesit atëror për Jezusin - thuhet në dekretin e sotëm -
shën Jozefi i Nazaretit, në krye të Familjes Hyjnore, plotësoi katërcipërisht misionin
e marrë… dhe u bë model shembullor i asaj përvuajtërie bujare, që krishterimi e ngre
në majat më të larta, u bë dëshmitar i atyre virtyteve të përbashkëta, njerëzore e
të thjeshta, të nevojshme që njerëzit të jenë ndjekës të ndershëm e të vërtetë të
Krishtit”.