Իրան «Ժընեւ-2»-ին Մասնակցելու Հրաւէր Ստացաւ» Կ՛ըսէ Սալեհի

Իրանի արտաքին գործոց նախարար Ալի Աքպար Սալեհի երէկ յայտարարեց, որ «Թեհրան «Ժընեւ-2»-ին մասնակցելու բերանացի հրաւէր ստացաւ»: Ան նշեց, որ «մեզ տեղեակ պահեցին, որ Ամերիկա «Ժընեւ-2»-ին Իրանի մասնակցութեան չ՛ընդդիմանար, սակայն գոյութիւն ունին երկիրներ, որոնք այդ մէկը արգելակելու համար ճնշում կը բանեցնեն»:
Իրանի դիւանագիտութեան պետը ընդգծեց, որ «առանց Իրանի մասնակցութեան շրջանին մէջ որեւէ լուծում պիտի չյաջողի»:
Իրանի նորընտիր նախագահ Հասան Ռուհանի երէկ լրագրողներու հետ հանդիպումի մը ընթացքին յայտնեց, որ Սուրիոյ տագնապի լուծման պատասխանատուն սուրիացի ժողովուրդն է: Ան մերժեց Սուրիոյ մէջ ահաբեկչութիւնը, քաղաքացիական պատերազմն ու արտաքին միջամտութիւնը:
Ռուհանի աշխարհի երկիրներուն կոչ ուղղեց Սուրիոյ մէջ կայունութեան եւ ապահովութեան վերականգնման օժանդակելու` ընդգծելով, որ սուրիական ներկայ կառավարութիւնը օրինական է եւ պէտք է մինչեւ 2014-ի ընտրութիւնները իշխանութեան վրայ մնայ: