Թրիփոլիի Եւ Թարիք Ժտիտէի Մէջ Ճամբաները Կը Փակուին Հրկիզուող Անիւներով
Թրիփոլիի եւ Թարիք Ժտիտէի մէջ երէկ հրկիզուող անիւներով քաղաքացիները փակեցին ճամբաները,
իսկ բանակը ամէն ջանք թափեց բանալու այդ ճամբաները:Թրիփոլիի Սուրիա փողոցին մէջ արձանագրուեցան նաեւ զինեալ բախումներ, իսկ Թրիփոլիի միջազգային ճամբան երկար ատեն փակ մնաց:
Թրիփոլիի մէջ արձանագրուած այդ շարժումները կը նկատուէին բողոքի ցոյցեր այն իրականութեան համար, թէ բախումներէն տուժած որոշ ընտանիքներուն անունները չէին նշուած` օժանդակութիւններ ստացող ընտանիքներուն անուանացանկին մէջ:
Միւս կողմէ, Պէյրութի Մարզական աւանին մօտ եւս կատարուեցան նման ցոյցեր եւ հրկիզուող անիւներով փակուեցան ճամբաները` իբրեւ բողոք Թարիք Ժտիտէի մէջ երկու անձերու ձերբակալութեան դէմ:
Երկու անձերը Ժեզզինի եւ Նապաա ընտանիքներու անդամներէն են եւ անոնք ձերբակալուած են Քայիտայի ցանցին անդամակցութեան պատճառով:
Նկատի ունենալով բողոքի ցոյցերը եւ ապահովութեան ուժերուն մօտ կատարուած քաղաքական միջամտութիւնները` ձերբակալուած երիտասարդները չորս ժամ ետք ազատ արձակուեցան:
| All the contents on this site are copyrighted ©. |