Францішак: хрысціянін павінен быць рэвалюцыянерам праз ласку
Сапраўднай рэвалюцыяй
назваў хрост папа Францішак падчас сустрэчы з прадстаўнікамі Рымскай дыяцэзіі 17 чэрвеня.
Было шмат рэвалюцыянераў у гісторыі, але ніхто не змог зрабіць рэвалюцыі падобнай
на тую, якую прынёс Езус, Ён здзейсніў глыбокую змену чалавечых сэрцаў. “Рэвалюцыі
ў гісторыі змянялі палітычныя, эканамічныя сістэмы, але ніводная з іх не змяніла сэрца
чалавека”, - падкрэсліў Папа і дадаў, што сапраўдная рэвалюцыя – тая, якая радыкальна
змяняе жыццё, што і здзейсніў Хрыстус праз свой крыж і ўваскрасенне. Хрысціяне, на
думку Пантыфіка, з’яўляюцца ўдзельнікамі гэтай рэвалюцыі, сапраўднымі рэвалюцыянерамі,
таму што ідуць па шляху найбуйнейшай змены ў чалавечай гісторыі. “Хрысціянін, калі
ён сёння не рэвалюцыянер, ён не хрысціянін! Ён павінен быць рэвалюцыянерам праз ласку!”,
- падкрэсліў Францішак. Ласку дае Хрыстус, і толькі Ён у стане гэта зрабіць, дадаў
ён. Гэта, у сваю чаргу, павінна падштурхоўваць кожнага дзяліцца ласкай, бескарысліва.
І вельмі сумна, адзначыў Пантыфік, што ў гісторыі некаторыя імкнуліся гандляваць ласкай.
Звяртаючыця
да ўдзельнікаў дыяцэзіяльнага сходу, Папа адзначыў, што сёння шматлікія людзі “жывуць
без надзеі”, шукаючы шчасця ў алкаголі, наркотыках, азартных гульнях, сіле грошай,
сексуальнасці без правілаў. Ён заўважыў, што гэта безнадзея закранула асабліва маладых
людзей, многія з якіх, страціўшы сэнс жыцця, спрабуе скончыць жыццё самагубствам.
“Вы ведаеце, колькі самазабойстваў маладых людзей адбываецца ў сучасным свеце?”, -
задаў рытарычнае пытанне Папа. Толькі хрысціяне могуць падарыць сучаснаму свету надзею,
падкрэсліў ён, і зрабіць гэта праз сведчанне свайго жыцця, свабоду і радасць. Таму
менавіта паслядоўнікі Хрыста павінны быць мужнымі, сутыкаючыся з праблемай сацыяльнага
або рэлігійнага крызісу.
Сённяшні свет, падкрэсліў Францішак, чакае, што Касцёл
адкрыецца на яго, што адчыняцца дзверы супольнасцяў, перш за ўсё, парафій. “Я не разумею
хрысціянскай супольнасці зачыненай у межах парафіі”, - прызнаўся Папа. Такія “стэрыльныя
супольнасці”, заўсёды бясплённыя, дадаў ён. “Евангельская плённасць паходзіць з ласкі
Езуса Хрыста, але праз нас, наша прапаведванне, нашу мужнасць і наша цярпенне”, -
лічыць Францішак.
Адзінае, аб чым просіць Езус – быць прынятым, нагадаў Папа.
Вучні Укрыжаванага, падкрэсліў Францішак , не могуць не ісці ў тыя месцы, куды ніхто
не жадае ісці з-за страху быць скампрамітаваным або асуджаным іншымі, бо там знаходзяцца
тыя, хто чакае на Божае Слова.