Në G8-ën e Irlandës, asnjë marrëveshje SHBA-Rusi për Sirinë
Përfundoi sot në Irlandën e Veriut, mbledhja e G8-ës, nën presidencën e Britanisë
së Madhe. Ndërmjet temave ekonomike e luftës kundër terrorizmit, mbizotëroi debati
për konfliktin në Siri, për të cilin SHBA-të dhe Rusia nuk gjetën gjuhën e përbashkët.
Çështja kryesore është dhënia e armëve kryengritësve. Amerikanët dhe Bashkimi Evropian
janë për armatosjen e tyre, ndërsa rusët ndihmojnë regjimin e Bashar Al Asadit. Në
një intervistë për një gazetë gjermane, presidenti sirian kërcënoi: “Nëse perëndimorët
do t’u japin armë terroristëve, ata do të synojnë gjithnjë e më shumë edhe territorin
e tyre. Vetë Evropa do të paguajë një haraç tepër të lartë”. U fol edhe për ndalimin
e fluturimeve në qiellin sirian, por presidenti rus Putin u shpreh ashpër kundër kësaj
mase. Ndërkaq, presidenti amerikan Obama u mundua të pajtojë disi qëndrimet e kundërta,
duke mbështetur hipotezën e konferencës “Gjeneva 2” në favor të paqes në Siri. E vetmja
temë për të cilën ranë dakord të gjithë, qe ndalimi i përdorimit të armëve kimike.
Por mbledhja e G8-ës u përqendrua edhe në gjendjen ekonomike botërore, duke nënvizuar
perspektivën akoma negative për Eurozonën. Presidenti Barak Obama njoftoi se do të
fillojnë bisedimet për një marrëveshje mbi tregtinë e lirë ndërmjet SHBA-ve dhe Bashkimit
Evropian, e cila, në vitet e ardhshme, do të sjellë krijimin e miliona vendeve të
punës. Në shënjestër të krerëve të G8-ës, edhe lufta kundër mospagimit të taksave,
bilanci i vendeve evropiane dhe lufta kundër terrorizmit, me problemin e pagesës së
shumave të mëdha për rrëmbyesit e perëndimorëve dhe me çështjen e trafikut të drogës,
një nga burimet më të mëdha financiare për terrorizmin.