«Օգնի՛ր Եղբօրդ» Բարեգործական Հիմնադրամ. Շուրջ 600 Սուրիահայեր Արձանագրուած Են Դաւթաշէնի Մէջ Բնակարան Ստանալու Համար

Եգիպտոսի նախագահ Մոհամետ Մուրսի շաբաթ օր Գահիրէի մէջ «Աջակցինք Սուրիոյ» խորհրդաժողովին ընթացքին իր արտասանած խօսքին մէջ յայտարարեց, որ Եգիպտոս կը խզէ Սուրիոյ հետ դիւանագիտական յարաբերութիւնները եւ Դամասկոսի մէջ իր դեսպանը տուն կը կանչէ:
Մուրսիի որոշումով Գահիրէի մէջ «սուրիական վարչակազմի դեսպանատունը» պիտի փակուի: Եգիպտոսի նախագահը նաեւ Հըզպալլայէն պահանջեց իր ուժերը դուրս բերել Սուրիոյ տարածքէն:
Մուրսի միջազգային ընտանիքին կոչ ուղղեց նպաստել Սուրիոյ մէջ թռիչքներու արգիլեալ գօտիի ստեղծման:
«Օգնի՛ր Եղբօրդ» Բարեգործական Հիմնադրամ. Շուրջ 600 Սուրիահայեր Արձանագրուած Են Դաւթաշէնի Մէջ Բնակարան Ստանալու Համար
Հայաստանի մէջ բնակող շուրջ 600 սուրիահայեր արդէն արձանագրուած են «Օգնի՛ր եղբօրդ» բարեգործական հիմնադրամին կողմէ կառուցուելիք շէնքին մէջ բնակարան ստանալու համար: Այս մասին «Արմենփրես» լրատու գործակալութեան հետ ունեցած զրոյցին ընթացքին ըսաւ «Օգնի՛ր եղբօրդ» բարեգործական հիմնադրամի ներկայացուցիչ Վահան Վարդանեան:
«Այդքան մարդ արդէն արձանագրուած է, երբ «Օգնի՛ր եղբօրդ»-ը միայն քաղաքացիական նախաձեռնութիւն էր, իսկ իբրեւ հիմնադրամ արձանագրութիւնները պիտի սկսին երկուշաբթի օրուընէ, որմէ ետք աւելի յստակ պիտի ըլլայ արձանագրուածներու թիւը», ըսաւ Վարդանեան:
Ան նաեւ նշեց, որ տակաւին յստակ չէ, թէ ի՛նչ սկզբունքով բնակարանները պիտի յատկացուին: Այդ սկզբունքը պիտի որոշեն հիմնադրամի հոգաբարձուները:
Անդրադառնալով Լեռնային Ղարաբաղի Հանրապետութեան մէջ հաստատուած սուրիահայ 35 ընտանիքներուն` Վարդանեան շեշտեց, որ յունիսին կը պատրաստուին դարձեալ այցելելու Արցախ` սնունդ եւ դեղորայք տանելու համար:
«Այնտեղ հաստատուած ընտանիքները հիանալի վիճակի մէջ են: Մենք երեք անգամ գումար փոխանցած ենք, եւ վերանորոգուած են անոնց բնակարանները: Բացի բնակարանէն նաեւ հողատարածքներ ունին», ըսաւ Վարդանեան: Ան վերահաստատեց, որ «Օգնի՛ր եղբօրդ» հիմնադրամը պիտի շարունակէ աջակցիլ Հայաստանի եւ Արցախի մէջ հաստատուած սուրիահայերուն:
«Օգնի՛ր եղբօրդ» բարեգործական հիմնադրամը Երեւանի Դաւթաշէն վարչական շրջանին մէջ սուրիահայերուն համար բնակելի շէնք պիտի կառուցէ: