Në Engjëllin e Tënzot, Papa lutet për jetën e brishtë, të pambrojtur e të kërcënuar;
kujton edhe të Lumin e ri, Odoardo Fokerini
Pas kremtimit eukaristik, kushtuar Ungjillit të Jetës, Papa Françesku kujtoi të Lumin
e ri, shpallur dje në Karpi të Italisë e, sidomos, familjet dhe të gjithë ata, që
mbrojnë jetën, duke u lutur posaçërisht për jetën e brishtë, të pambrojtur, të kërcënuar.
Në
lutjen e Engjëllit të Tënzot, Papa citoi, pra, një dëshmitar të Ungjillit të jetës:
Odoardo Fokerinin, burrë i martuar e baba i shtatë fëmijëve, që u shpall dje i Lum
në Karpi, në Emilia Romanja: “I arrestuar e i burgosur nga urrejtja për fenë
e tij katolike, vdiq në kampin e përqendrimit të Hersbruck, në vitin 1944, në moshën
37 vjeçare. Shpëtoi një numër të madh hebrenjsh nga persekutimi nazist. Së bashku
me Kishën në Karpi, ta falënderojmë Zotin për këtë dëshmitar të Ungjillit të Jetës”. Papa
Françesku iu lut Virgjërës Mari ... “...duke ia besuar çdo jetë njerëzore,
posaçërisht më të brishtën, më të pambrojturën, më të kërcënuarën, mbrojtjes së saj
amtare”. Më pas, falënderimi për ata, që mbrojnë ditë për ditë jetën e
familjen: “Ju falënderoj nga zemra ju, të gjithë, që erdhët në Romë nga të
katër anët e Italisë e të botës, posaçërisht familjet, si dhe ata, që punojnë drejtpërdrejt
për mbrojtjen e jetës. Përshëndes përzemërsisht 150 anëtarët e Shoqatës “Gravida Argentina”
mbledhur në qytetin e Pilar. Faleminderit shumë për gjithçka bëni. Guxim e gjithnjë
përpara!”. Një përshëndetje të posaçme nga Papa, morën edhe pjesëmarrësit
në takimin motoçiklistik Harley-Davidson si dhe në atë të Motoklubit të Policisë së
Shtetit.