Արագընթաց զարգացումներ արձանագրուեցան երէկ կէսօրէ ետք Յունաստանի մամլոյ խօսնակ Սիմոս
Քետիքօղլուի անակնկալ յայտարարութենէն ետք, թէ կառավարութիւնը որոշած է գիշերուայ ժամը
11-ին դադրեցնել պետական հեռատեսիլի հեռարձակումը: Այս մասին կը հաղորդէ Յունաստանի “Ազատ
օր” օրաթերթը: Քետիքօղլու յայտնեց, թէ աւելի սահմանափակ ծախսերով ու վերակառուցուած
հանրային հեռուստակայանի նոր համակարգ պիտի ստեղծուի Սեպտեմբերին: Ինչպէս յայտնի դարձաւ,
կառավարութիւնը ի վիճակի չէ հանրային կեանքէն ներս աշխատաւորներու թիւի պարտադրուած կրճատումները
կատարելու, ուստի կը դիմէ անակնկալ դադրեցումներու: Երկրի մամլոյ ընդհանուր համակարգը
խստօրէն քննադատեց կառավարութեան որոշումը՝ յայտարարելով գործադուլներու շարք մը: