Papa Françesku për punën e të miturve: mjerë ai, që mbyt shpresën e paqen e fëmijëve
Në përfundim të audiencës së përgjithshme, mbajtur paradite në Vatikan, duke kujtuar
se sot kremtohej Dita kundër punës të të miturve, Papa Françesku u ndalua mbi këtë
fenomen. Është plagë e pashëruar, kujtoi Ati i Shenjtë, duke i bërë thirrje bashkësisë
ndërkombëtare.
“Këta njerëz, në vend që t’u krijojnë fëmijëve kushte për të
luajtur, i kthejnë në skllevër”. Është britmë dhimbjeje, kjo e Papës Françesku, që
përshkroi si shfrytëzohen fëmijët për punë shtëpijake, temë kjo, mbi të cilën përqendrohet
Dita kundër punës së të miturve. E, duke iu drejtuar institucioneve ndërkombëtare,
Ati i Shenjtë kujtoi përpjestimet në rritje të kësaj plage: “ Është fenomen
i dënueshëm, në rritje të vazhdueshme, posaçërisht në vendet e varfëra. Janë miliona
të mitur, sidomos vajza të vogla, viktima të kësaj forme të fshehur të shfrytëzimit,
që arrin shpesh deri në shpërdorime, keqtrajtime e diskriminime. Është skllavëri e
vërtetë, kjo! Uroj me gjithë zemër që bashkësia ndërkombëtare të marrë masat e nevojshme
për shërimin e kësaj plage të mirëfilltë. Të gjithë fëmijët duhet të kenë mundësi
të luajnë, të studiojnë, të luten e të rriten në familjet e tyre...”. Sipas
të dhënave të Unicef-it, më se 150 milionë fëmijë, në moshën 5 deri në 14 vjeç, shfrytëzohen
në forma të ndryshme të punës për të mitur. Për organizatën ndërkombëtare të punës
(Oil), 15 milionë e gjysëm merren me punë shtëpiake. Për këtë plagë, që dhemb shumë,
të dëgjojmë Rosela Panucon, përfaqësuese e organizatës jo qeveritare “Tokat
e Njerëzve”, që na përshkruan situatën në Perù:
“Në zonat fshatare të
Andeve jetojnë bashkësitë indiane, që prej kohe shikohen si qytetarë të kategorisë
së dytë. Ka pak shkolla, kështu, për të ndjekur shkollat e mesme e të larta, fëmijët
duhet të shkojnë në qytete. Shpesh ky kalim është tejet i rrezikshëm, sepse vajzat
u besohen familjeve të të njohurve e përfundojnë në shërbëtore, shfrytëzohen për punë
shtëpiake. Natyrisht, pa kurrfarë pagese. Puna i pengon të shkojnë në shkollë. Izolohen
plotësisht, duke humbur edhe lidhjet me familjet”. Edhe fenomene si
ky, kujtoi Ati i Shenjtë, duke bërë thirrje: “Një
fëmijëri e qetë u krijon fëmijëve mundësinë ta shikojnë me besim jetën e të nesërmen.
Mjerë kush mbyt në shpirtin e tyre hovin gazmor të shpresës”.
Një shenjë
shprese është, për shembull, historia e Xheniferit, që vjen nga Peruja, me të cilën
flet përsëri, Rosela Panuco:
“Kishte mbetur jetime si nga babai,
ashtu edhe nga e ëma. Gjyshërit ishin tepër të moshuar, kështu nuk qenë në gjendje
të merreshin me të. Vajza jetonte falë mëshirës së njerëzve përqark, kulloste delet
e ishte në rrezik të bëhej pre e gjithkujt. Shoqata ‘Tokat e Njerëzve’ i pyeti ata,
që kishin mbetur nga familja e Xheniferit në se ishte më mirë që vajza të jetonte
në qendrën Kuzko e, prej këndej, të dërgohej edhe në shkollë. Xheniferi
sot është 14 vjeçe, mëson në shkollë e shpreson se nuk do të jetojë kurrë më në kushtet
e varfërisë e të shfrytëzimit, kushte në të cilat vijojnë të jetojnë, me pak shpresa
për të shpëtuar, shumë nga bashkëmoshtarët e saj”.
Prej këndej,
thirrja e Papës: “Mjerë kush i katandis fëmijët në gjendje skllavi, në moshën
shpresave e të lojrave”.