Në audiencën e përgjithshme, i pranishëm edhe një grup rabinësh. Abraham Skorka flet për mirqësinë e tij me Papën

Ndërmjet pjesëmarrësve në audiencën e përgjithshme, ishte edhe një grup hebrenjsh e të krishterësh, të cilët këto ditë marrin pjesë, në Kastel Gandolfo, në një takim për thellimin e përmasës shpirtërore të dialogut, organizuar nga Lëvizja e Fokolarëve. Ndërmjet tyre, edhe Rabini Abraham Skorka, drejtor i Seminarit rabinik, latinoamerikan të Buenos Ajres. E pyetëm për miqësinë, që e lidh me Papën Françesku, lindur që kur Ati i Shenjtë ishte kryeipeshkëv në kryeqytetin argjentinas:

Përgjigje: - Është miqësi shumë e fortë, miqësi shumë e sinqertë, miqësi, përmes së cilës mund të japim, së bashku, një mesazh për bashkësinë e Buenos Ajres e, në fund, edhe për mbarë njerëzimin. Mesazh dialogu, mesazh njohjeje, lartimi shpirtëror. Mesazh që flet për ecje të përbashkët në udhët e jetës. Nuk është rastësi, që shkruam, së bashku, një libër kushtuar dialogut e regjistruam, po së bashku, 30 programe për kanalin e kryeipeshkvisë. Ishte pasojë e afrimit reciprok, pasojë e impenjimit të thellë për kumtimin e Biblës, për kumtimin e fjalëve të profetëve tanë - them ‘tanë’, profetë hebraikë, profetë të përbashkët. E gjithë kjo, duke pasur mirë parasysh ndjenjat e faljes e dëshirën për t’i kthyer fjalët në vepra. Për të treguar se njëri impenjohet së bashku me të gjithë ata, që e rrethojnë. Cili është plani ynë? Ç’mund të bëjmë për të lënë një gjurmë në jetë? Gjurmë, që nuk shlyhet, gjurmë shpirti, gjurmë të shkruar në shpirtin e njerëzve. Të gjitha mendimet që shpreh Papa lidhur me vlerat, në të gjitha predikimet e tij, në të gjitha fjalimet e homelitë, të duken si leksione, për ta mishëruar këtë dëshirë. Kjo është rruga, që e bëjmë së bashku. E kam ftuar dy herë në Tempullin e bashkësisë sime, në Sinagogë, që të na japë një mesazh para vitit të ri: vitit të ri hebraik. E ai më ftoi të jap mësim në seminarin, që formon meshtarët e ardhshëm, e shumë gjëra të tjera.

Pyetje: - Ç’përfaqëson për ju Papa Françesku lidhur me dialogun hebraiko-kristian?
Përgjigje: - Për mua, figura e Bergolios, mikut tim të dashur, sepse ma ka dëshmuar gjithnjë miqësinë e tij besnike, është sfidë: sfida është për ta kuptuar më mirë atë çast historik të popullit të Izraelit, kur nga njëra anë del në pah judaizmi rabinik, e nga ana tjetër, duket bashkësia e parë e krishterë. Kur analizohen burimet talmudike, në të cilat duken histori e rrethana dialogu ndërmjet të urtëve të Talmundit dhe barinjve të bashkësisë së parë të krishterë, mund të vërejmë pjesëmarrjen në një dialog shumë, shumë të posaçëm. Në një farë mënyre, e unë e ndjej këtë, duhet rikrijuar me të ky tip dialogu. Kjo është sfida jonë, përpjekja për t’iu përgjigjur çastit vigan të krizës shpirtërore, që po kalon njerëzimi sot.