«Թուրքիոյ Ցոյցերուն Թիրախը Վարչապետն Է» Կ՛ըսէ Պաղըշ
Թուրքիոյ մէջ ցոյցերը 11-րդ օրն ըլլալով շարունակուեցան: Կիրակի գիշեր ոստիկանութեան
եւ ցուցարարներուն միջեւ բուռն բախումներ տեղի ունեցան Ատանայի, Անգարայի եւ Պոլսոյ մէջ:
Էտիրնէի մէջ աւելի քան երկու հազար անձեր մասնակցեցան հակակառավարական ցոյցերուն, իսկ
Իզմիրի մէջ` աւելի քան տասը հազար անձեր: Թուրքիոյ Եւրոպական Միութեան հարցերով նախարար
Էկեմեն Պաղըշ յայտնեց, որ Թուրքիոյ մէջ տեղի ունեցող հակակառավարական ցոյցերը Թաքսիմի
Կեզի այգիին հետ որեւէ կապ չունին եւ անոնց թիրախը վարչապետ Ռեճեփ Թայիփ Էրտողանն է: Ան
յայտնեց, որ ցոյցերը բնապահպանական մտահոգութեամբ ծագեցան, ապա շահագործուեցան` աւելցնելով,
որ «անոնք, որոնք մեզ պարտութեան չեն կրնար մատնել իրենց ջանքերով, սկսած են մեր զաւակները
խաբելով ցոյցերը չարաշահել: Սակայն այս հասարակութիւնը անցնող տասը տարիներուն այդ գրգռութեանց
ականջ չէ կախած եւ ցոյցերուն սկսելէն տասը օր ետք ալ ականջ պիտի չկախէ»: «Հիւրրիյէթ
Տէյլի Նիուզ» կը հաղորդէ, որ Թաքսիմի միասնականութեան ծրագիրը, որ Կեզի այգիի ցոյցերու
շարժումը ներկայացնող խմբակ մըն է, մեղմացուցած է իր պահանջները` կառավարութեան կոչ ուղղելով
այգին չներառել շինարարութեան հաւանական որեւէ ծրագիրի մէջ: Թրքական քաղաքներուն մէջ
բռնարարքները մեծ մտահոգութիւն ստեղծած են 20-30 յունիսին Մերսինի մէջ նախատեսուած 2013-ի
Միջերկրականեան խաղերու կայացման իմաստով: «Ռոյթըրզ» կը հաղորդէ, որ Միջերկրականեան խաղերու
միջազգային կոմիտէն ապահովական երաշխիքներ եւ ընթացող ցոյցերուն մասին յաւելեալ տեղեկութիւններ
կը պահանջէ: Նշենք, որ մրցաշարքին կը մասնակցին միջերկրականեան 24 երկիրներ: