Papa: një Kishë e pasur është e plakur, Ungjilli kumtohet falas
Ungjilli duhet kumtuar me thjeshtësi e pa pritur shpërblim: këtë nënvizoi Papa Françesku
gjatë meshës së mëngjesit në Shtëpinë e Shën Martës, në Vatikan. Ati i Shenjtë theksoi
se nëse Kisha e dëshmon varfërinë e vet shpëton nga kthimi në organizatore e ndërtuese
e thjeshtë veprash, sado të mira e të vyera të jenë ato. Kur duam ta bëjmë të pasur
Kishën, e plakim atë, i marrim jetën. “Mos e ngjishni brezin as me ar, as me argjend,
as me të holla bakri”. Në Ungjillin e sotëm, kështu u thotë Jezusi Apostujve, të cilët
i dërgon të kumtojnë Mbretërinë e Hyjit. Zoti dëshiron që ky kumtim të bëhet sa më
thjeshtë, nënvizoi Papa Françesku. Është kumtim, që i lë vendin pushtetit të Fjalës
së Zotit. Vërtet Jezusi u thotë Apostujve: “Falas morët, falas edhe jepni”. Gjithçka,
theksoi Ati i Shenjtë, na jepet për hir të Zotit e kur duam të bëjmë ndryshe, duke
e harruar Hirin e Tënzot e duke e lënë mënjanë, Ungjilli nuk sjell fryte: “Predikimi
ungjillor lind nga kumtimi pa shpërblim, nga mahnitja para shëlbimit që vjen. Gjithçka
kam marrë falas, duhet ta jap falas. E në fillim, kështu ishte. Shën Pjetri nuk kishte
ndonjë llogari në bankë e, kur i duhej të paguante taksat, Zoti e çoi në det të peshkonte
e ta gjente monedhën brenda peshkut, për të paguar. Filipi, kur u takua me ministrin
e ekonomisë të mbretëreshës Kandace, nuk mendoi: ‘Ah, mirë, po bëjmë një organizatë
për përkrahjen e Ungjillit…’ Jo! Nuk bëri ndonjë ‘allishverish’ me të: kumtoi, pagëzoi
e shkoi”. Mbretëria e Zotit, vazhdoi Papa Bergolio, është dhuratë, falas.
Por që në fillimet e krishterimit, bashkësia e krishterë është tunduar ta gjejë forcën
e vet jo në këtë vlerë, por gjetiu. Edhe sot, ndodh kjo në Kishë e ky tundim krijon
turbullim, pasi kështu, kumtimi i Ungjillit ngjan me prozelitizmin e nuk është kjo
udha, nënvizoi Ati i Shenjtë. Duke cituar Benediktin XVI, Papa theksoi se radhët e
Kishës shtohen jo për hir të prozelitizmit, por sepse njerëzit tërhiqen prej saj.
E forca tërheqëse e Kishës Katolike vjen nga dëshmia e atyre, që pa shpërblim, kumtojnë
shëlbimin, që na është dhënë falas: “Gjithçka është hir. Gjithçka. Cilat janë
shenjat që tregojnë se një apostull e jeton këtë? Ka shumë, por po nënvizoj vetëm
dy: e para, varfëria. Kumtimi i Ungjillit duhet të ecë në udhën e varfërisë. Ta dëshmojmë
këtë varfëri: nuk kam pasuri, pasuria ime është vetëm dhurata, që më është dhënë,
Zoti. Kjo dhuratë falas: kjo është pasuria jonë! E varfëria na shpëton nga kthimi
në organizatorë, afaristë… Duhet të ecin përpara veprat e Kishës e, disa janë mjaft
të ndërlikuara, por me zemrën e varfërisë, jo me zemrën e investimit, apo të afaristit,
apo jo?” Kisha, vazhdoi Papa, nuk është organizatë jo qeveritare. Është diçka
tjetër, më e rëndësishme, që lind nga të qenët falas. Nga dhurata e marrë dhe e kumtuar
falas. Pra, përsëriti Ati i Shenjtë, varfëria është njëra prej shenjave të kumtimit
pa shpërblim të Ungjillit. Shenja tjetër është aftësia për t’i thurur lavde Hyjit.
Edhe kjo është lutje falas: nuk kërkojmë, por falenderojmë: “Këto të dyja janë
shenjat se apostulli e përjeton dhurimin falas: varfëria dhe aftësia për t’i thurur
lavde Zotit. E kur ndeshemi me apostuj, që duan ta bëjnë të pasur Kishën, pa dhurata
falas e pa lavde, atëherë Kisha plaket, Kisha bëhet organizatë jo qeveritare, Kisha
nuk ka më jetë. T’i lutemi sot Zotit ta njohim këtë dhuratë falas: ‘Falas kemi marrë,
falas jepni’. Ta njohim këtë dhuratë të Zotit e ta predikojmë Ungjillin me këtë frymë”.