Thellohet intoleranca fetare në Sri Lanka; një grup të panjohurish sulmoi kishën katolike
të Shën Françesk Saverit, në Angulana, kryedioqeza e Kolombos. Sipas agjencisë AziaNjuz,
vandalët thyen shtatoren e lashtë të Zojës së Bekuar e pastaj u sulën me tërbim kundër
tabernakullit. E shkulën nga elteri, duke u përpjekur t’i japin zjarr Eukaristisë.
Ngjarja ndodhi më 5 qershor, rreth orës 22.00, por policia nuk i ka kapur ende
shkaktarët e këtij sulmi kriminal. Prej disa muajsh në Sri Lanka po përsëriten sulmet
kundër pakicave fetare, posaçërisht kundër të krishterëve e islamikëve. Në përgjithësi
sulmet programohen nga grupet ekstremiste budiste (Bodu Bala Sena e Singala Ravaya),
që luftojnë për mbrojtjen e popullsisë budiste e singaleze, e cila përbën shumicën
e popullsisë, si dhe të fesë së saj. Sulmet e kësaj natyre janë gjë e re për këtë
vend, ku rrallë herë vërehen ngjarje të tilla, me ngjyrime fetare. Besimtarët e kryedioqezës
e shikojnë me keqardhje të thellë këtë sulm. Ndërsa janë thellësisht të prekur në
shpirt nga mrekullia, që ndodhi gjatë sulmit. Kjo mrekulli, me vlerë për të gjithë
besimtarët katolikë në botë, ua freskon shpirtin e u jep forcë për të vijuar më me
guxim apostullimin e tyre. Kur ishte kryer sulmi e sulmuesit qenë larguar, besimtarët
e krishterë hynë në kishën e kthyer përmbys. Në mes të saj gjetën tabernakullin e
shkulur nga elteri. Mbi të ishin derdhur 30 litra vajguri. Por, për çudi, hostet e
shuguruara nuk kishin marrë flakë. Ishin aty, në tabernakull, të paprekura! Kjo, pohojnë
disa besimtarë, përmes agjencisë AziaNjuz, është mrekulli. Është mesazh i Krishtit
për mbarë shoqërinë njerëzore, e edhe për njerëzit, që kryejnë sulme të tilla. S’ka
forcë në botë, që mund ta shkatërrojë Krishtin e dashurinë e Tij. Dashuria e Tij,
e kryqëzuar një herë, ngadhënjeu mbi vdekjen. Nuk mund të digjet, prandaj. Sepse
Zoti vdiq, hoqi dorë nga jeta e vet, për ne, e pastaj u ngjall. S’ka forcë në botë
që mund ta zhdukë Krishtin!