Սիրտ Յիսուսի Նուիրուած Ամսուայ Առթիւ Ս. Պատարագ Մատոյց Գերպծ. Գաբրիէլ Թ.Ծ.Վ. Մուրատեան
Ս. Փրկիչ Եկեղեցւոյ Մէջ
Կիրակի 9 Յունիս 2013-ին, երեկոյեան ժամը 6:00-ին, հովանաւորութեամբ Ամենապատիւ և Գերերջանիկ
Տէր Ներսէս Պետրոս ԺԹ. Կաթողիկոս Պատրիարք Տանն Կիլիկիոյ Կաթողիկէ Հայոց և կազմակերպութեամբ
Հայ Կաթողիկէ Ս. Փրկիչ ժողովրդապետութեան և իր զանազան միութիւններուն, Ս. Փրկիչ եկեղեցւոյ
մէջ Սիրտ Յիսուսի ամսոյն առիթով Ս. Պատարագ մատոյց Գերպծ. Գաբրիէլ Թ.Ծ.Վ. Մուրատեան,
Զմմառու Պատրիարքական Կղերի Միաբանութեան Ընդհանուր Փոխանորդ և Պատրիարքական Փոխանորդ
Պէյրութի Թեմի: Ս. Պատարագին ներկայ էին հայ կաթողիկէ եկեղեցիներու ժողովրդապետ Հայրերը,
Զմմառու վանքի վարչական Հայրերը և ժառանգաւորները, համայնքիս կարգ մը անձնաւորութիւններ
և խուռն բազմութիւն մը հաւատացեալներու: Սրբազան երգեցողութիւնը հոգեզմայլօրէն կատարեց
Ս. Փրկիչ Երգչախումբը, ղեկավարութեամբ Մաէսթրօ Մանուէլ Սրկ. Քէշեշեանին: Ս. Պատարագի
աւարտին՝ Սիրտ Յիսուսի բարեպաշտութեան ծագման շինիչ դրուատիքը կատարեց Գերյ. Հ. Եղիա
Ծ. Վրդ. Եղիայեանը: Ապա բոլոր հոգեւորականներու և ժողովուրդի մասնակցութեամբ, Ս.
Մեսրոպ և Ս. Գրիգոր Լուսաւորիչ Սկաուտներուն հսկողութեամբ, կատարուեցաւ հանդիսաւոր
թափօր, Ս. Փրկիչ եկեղեցւոյ մուտքէն դէպի Պուրճ Համուտի գլխաւոր հրապարակը, որմէ ետք Մեսրոպեան
Վարժարանի փակին մէջ Ս. Հաղորդութեան օրհնութիւն տուաւ Գերպծ. Մեծաւորը: Այս սուրբ
տօնին առթիւ՝ Զմմառու Պատրիարքական Միաբանութիւնը կը մաղթէ բոլոր հաւատացեալներուն իրենց
հոգեւոր վերանորոգման իրականացում, Սիրտ Յիսուսի հզօր բարեխօսութեամբ: