Германія: закончыўся Нацыянальны Эўхарыстычны кангрэс
9 чэрвеня ў нямецкім
Кёльне закончыўся Нацыянальны Эўхарыстычны кангрэс. У заключнай св. Імшы, якая прайшла
на гарадскім стадыёне, прынялі ўдзел каля 20 тыс. вернікаў, у тым ліку 1200 міністрантаў
і каля 1000 дзяцей, якія рыхтуюцца да першай Святой Камуніі. Падчас Эўхрастыі, спецыяльны
пасланнік папы Францішка кардынал Пауль Ёзэф Кордэс зачытаў прывітальнае пасланне
Пантыфіка, якое было прынята сабранымі з вялікім энтузіязмам. Да прысутных звярнуліся
таксама старшыня нямецкага епіскапата кардынал Роберт Цоліч і арцыбіскуп Кёльскі Ёахім
Майснер, якія падзякавалі вернікам за актыўны ўдзел у кангрэсе і заклікалі несці ва
ўласныя дыяцэзіі сваю “умацаваную і больш свежую веру”.
Нацыянальны Эўхарыстычны
кангрэс праходзіў у Германіі з 5 па 9 чэрвеня. Падчас яго гучалі шматлікія катэхезы,
разважанні, дыскусіі, малітвы, а таксама адбываліся сяброўскія сустрэчы з няверуючымі.
За пяць дзён форума ў ім прынялі удзел каля 45 тыс. чалавек з усёй краіны.