Pritet ofensiva masive e regjimit sirian në Haleb. Në Liban, rritet tensioni
Regjimi sirian paralajmëron se kundër rebelëve në Haleb do të fillojë së shpejti një
ofensivë masive. E konflikti e ngre gjithnjë e më tepër tensionin në Libanin fqinjë,
ku shpërthejnë probleme të thella politike e fetare ndërmjet shiitëve e sunitëve,
mbajtur gjithmonë nën hi. Dje, në Bejrut, u mbajt një manifestim kundër përfshirjes
së hezbollahëve në konfliktin sirian. Njëri prej aktivistëve, kundër vendimit të së
ashtuquajturës “Parti e Zotit”, u vra gjatë ndeshjeve, përpara ambasadës iraniane.
Megjithëse militantë nga Libani, nisen për të shtuar radhët si të kryengritësve sirianë,
ashtu edhe të ushtrisë së regjimit, përkrahja e hezbollahëve për al-Asadin është kundërshtuar
si kurrë ndonjëherë, pas betejës së Kuzairit, simbol i fitores së aleancës së tyre
me regjimin. E në qytetin sirian të Halebit, ku ofensiva e Al-Asadit duket mjaft
e afërt, dje, një grup islamik, i lidhur me Al Kaedën, vrau një 15-vjeçar mu përpara
prindërve, për shkak të një komenti, që ata e quajtën blasfem. Ndërkaq, nga zona e
Kuzairit, në perëndim të Sirisë, televizionet e gjithë botës tregojnë pamje shkatërrimi,
sidomos kisha e xhamija të rrënuara. “Që prej një viti – pohon atë Simon Fadul, kreu
i Karitasit të Libanit, në mikrofonin tonë – nuk kemi më lajme për bashkësinë e krishterë
të zonës”: Problemi i Kuzairit nuk është vetëm ai i kishave. Në Kuzair, krejt
gjendja është tragjike, është shkatërrim i vërtetë: në zonat e luftës, shumë njerëz
kanë mbetur viktima e shumë të tjerë kanë humbur pasurinë, shtëpinë, gjithçka. Shumë
kanë arritur të ikin, ndërsa të tjerë janë bllokuar në Kuzair e kanë nevojë urgjente
për ndihmë e ngushëllim. Nga lajmet mësojmë se bashkësia ndërkombëtare do t’u kërkojë
palëve në konflikt lejen për të dërguar ushqime e gjëra të tjera, që njerëzit të mos
vdesin urie. Kjo është gjendja në Kuzair, tragjedi e plotë… të shohim… Cila
është gjendja e të krishterëve në Siri? Ata, në të kaluarën, bashkëjetonin paqësisht
me myslimanët… Të krishterët vazhdojnë të jetojnë bashkë me myslimanët e nuk
ka probleme përsa i përket bashkëjetesës. Nuk ka ndonjë persekutim të qëllimshëm kundër
të krishterëve, por ka pasur sulme nga ana e disa fanatikëve: të krishterët vriten,
ose rrëmbehen, janë marrë peng ipeshkvij e meshtarë. Por këto janë sulme nga ana e
fraksioneve ekstremiste islamike, jo nga ana e popullsisë siriane. Sirianët jetojnë
bashkë, të krishterë e myslimanë. Problem janë fondamentalistët! E cila është
situata e refugjatëve sirianë në Liban? Është gjendje që po keqësohet vazhdimisht.
Nevojat rriten çdo ditë e mundësia për t’i plotësuar pakësohet gjithnjë e më shumë.
Shifrat fillojnë e bëhen tepër të mëdha: flasim për 2 milion e 400 mijë refugjatë
në Liban! Janë tepër, shumë më tepër nga ç’mund të ndihmojmë.