Францішак: глядзець на жыццёвыя сітуацыі праз прызму Божага Слова
Вучыцца ад Панны Марыі,
як прымаць і захоўваць Слова Божае, заклікаў папа Францішак падчас ранішняй Эўхарыстыі
ў Доме св. Марыі 8 чэрвеня. Разам са Святым Айцом у ёй прынялі ўдзел супрацоўнікі
каталіцкай дабрачыннай арганізацыі “Caritas Internationalis”. У гаміліі, прымеркаванай
да ўспаміну Беззаганага Сэрца Найсвяцейшай Панны Марыі, які адзначаецца ў Касцёле
сёння, Святы Айцец нагадаў, што Маці Божая з’яўляецца прыкладам “захавання” Божага
Слова, бо глядзела на сваё жыццё менавіта праз яго прызму. “Захоўваць Слова Божае:
што значыць гэта? Я прымаю слова, бяру бутэльку, закрываю яго там і захоўваю? Не.
Захоўваць Слова Божае азначае, што наша сэрца становіцца адкрытым на яго, як зямля,
якая адкрываецца, каб прыняць зерне. Слова Божае – гэта зерне, якое трэба сеяць. Езус
казаў нам, што здараецца з зернем: некаторыя падаюць пры дарозе, прылятаюць птушкі
і з’ядаюць іх. Гэта пра слова незахаванае, пра сэрцы няздольныя прымаць яго”, - адзначыў
Пантыфік.
Папа нагадаў, словы Езуса пра тое, што адной з прычын няздольнасці
захавання Божага Слова з’яўляецца непастаянства: калі надыходзяць хваляванні – некаторыя
забываюць пра яго. Таксама перашкодамі могуць быць “церні” у якія яно падае, напрыклад
прывязанасць да багаццяў ці парокаў. Такім чынам “захоўваць Божае Слова азначае параўноўваць,
што яно кажа нам з тым, што здараецца ў нашым жыцці”, - сказаў Папа і дадаў, што менавіта
так жыла Марыя – “разважала і параўноўвала”. “Гэта вялікая духоўная праца”, - сказаў
ён.
“Захоўванне Слова Божага адбываецца дзякуючы гэтай працы: пошуку значэння
таго ці іншага моманту, таго, што мне хоча сказаць Пан у гэты момант, як зразумець
гэту сітуацыю ў параўнанні з Божым Словам. Чытаць жыццё праз Божае Слова – гэта значыць
захоўваць”, - адзначыў Святы Айцец.
Пантыфік заклікаў кожнага паразважаць:
ці пытаюся ў сябе, пра значэнне сітуацый, якія Бог стварае ў маім жыцці? Ён падкрэсліў,
што Слова Божае з’яўляецца “пасланнем, якое Бог нам скіроўвае ў кожны момант”.