Ուաշինկթընի Մէջ. Նալբանդեան Հանդիպում Ունեցաւ Քերրիի Հետ
Ուաշինկթընի մէջ գտնուող Հայաստանի արտաքին գործոց նախարար Էդուարդ Նալբանդեան հանդիպում
ունեցաւ Միացեալ Նահանգներու արտաքին գործոց նախարար Ճոն Քերրիի հետ: Ըստ Քերրիի,
Հայաստան եւ Միացեալ Նահանգներ գործընկեր են տարբեր նախաձեռնութիւններու մէջ: Հայաստան
իր նպաստը կը բերէ Աֆղանիստանի մէջ անվտանգութեան ապահովման ուժերուն եւ կարեւոր դեր
կը կատարէ Քոսովոյի մէջ խաղաղութեան ապահովման գործին մէջ: «Մենք կարեւոր կը նկատենք
երկու երկիրներուն միջեւ տնտեսական համագործակցութեան զարգացումը, ժողովրդավարութեան
ամրապնդումը եւ բարեկամ հայ ժողովուրդի անվտանգութեան ապահովումը», ընդգծեց Միացեալ Նահանգներու
արտաքին գործոց նախարարը: Շնորհակալութիւն յայտնելով ջերմ ընդունելութեան համար`
նախարար Նալբանդեան յայտնեց, որ ինք ուրախ է Ուաշինկթըն գտնուելով եւ հանդիպում ունենալով
Միացեալ Նահանգներու արտաքին գործոց նախարար Քերրիի հետ` քննարկելու Հայաստանի եւ Միացեալ
Նահանգներու միջեւ բարեկամական գործընկերութիւնը ամրապնդելու ուղիները: