Францішак да будучых дыпламатаў: ваша праца можа быць шляхам да святасці
Штодзённая праца папскага
дыпламатычнага прадстаўніка можа стаць для яго “трэніровачнай залай святасці”, лічыць
Святы Айцец. 6 чэрвеня Пантыфік прыняў на аўдыенцыі навучэнцаў і выкладчыкаў Папскай
касцёльнай акадэміі – установы, якая рыхтуе дыпламатаў Апостальскай Сталіцы. Звяртаючыся
да іх, Папа сказаў, што “служэнне папскіх прадстаўнікоў, як і любое іншае святарскае
служэнне, патрабуе вялікай унутранай свабоды”. “Але што значыць – мець унутраную свабоду?”,
- спытаў ён. “Перш за ўсё азначае быць свабоднымі ад асабістых планаў: ад пэўных канкрэтных
задум, з якімі вы, магчыма, некалі думалі пражыць ваша святарства, ад магчымасці праграмаваць
будучыню, ад перспектывы надоўга заставацца на “вашым” месцы ў душпастырскай дзенайсці”,
- сказаў Папа. Святы Айцец таксама падкрэсліў, што ўнутраная свабода можа быць звязана
са свабодай ад сваёй роднай культуры і ментальнасці, не для таго, каб забыцца пра
яе, але, каб адкрыцца ў любові на разуменне розных культур і сустрэчу з людзьмі, які
належаць да іншых, нават самых далёкіх светаў.
Папа адзначыў, што быць унутрана
свабодным, азначае таксама быць свабодным ад уласных амбіцый і мараў. Паводле яго,
на першае месца трэба ставіць не ўласную самарэалізацыю, ці імкненне да прызнання
ўнутры касцёльнай супольнасці, але “найвышэйшае евангельскае дабро і спаўненне даверанай
місіі”.
“Адным словам, служэнне да якога вы рыхтуецеся, патрабуе ад вас выйсця
па-за сябе, адмаўленне ад сябе, якое можа быць дасягнута выключна праз насычаны духоўны
шлях і сур’ёзнае злучэнне жыцця з таямніцай любові Божай і неспасцігальным планам
яго паклікання”, - падкрэсліў Папа.
Францішак нагадаў пра прыклад папы Яна
ХХІІІ, для якога менавіта дыпламатычная служба стала месцам, “дзе сфарміравалася яго
святасць”. Ён адзначыў, што “Добры Папа” заўсёды клапаціўся аб сваёй душы, у кантэксце
самых розных касцёльных і палітычных абавязкаў. “Адсюль нарадзілася яго ўнутраная
свабода, радасць, якая праяўлялася знешне, і сама эфектыўнасць яго душпастрыскай і
дыпламатычнай дзейнасці”, - падкрэсліў Святы Айцец.