Papa Françesku: të mos i lejojmë idhujt të ngrenë pengesa mes nesh e Zotit
Secili prej nesh ka idhuj të vegjël apo të mëdhenj, por udha e Zotit kalon përmes
dashurisë vetëm për Të, siç na mëson Jezusi. Kështu tha Papa Françesku në meshën e
mëngjesit në Shtëpinë e Shën Martës, në Vatikan. Si gjithnjë, u bazua në Ungjillin
e ditës, që tregon për skribin, i cili përpiqet të sfidojë Krishtin, duke e pyetur
për Urdhërimet e Tënzot. Jezusi i thotë Urdhërimin e parë, por pastaj nënvizon se
i pari ndër të gjithë urdhërimet është “duaje tjetrin si vetveten”. Kur skribi e pranon
këtë haptas, Jezusi i thotë: “Nuk je larg nga Mbretëria e Hyjit”. Është, tha Papa
Françesku, sikur Jezusi t’i thoshte se skribi e dinte mirë teorinë, por i mungonte
zbatimi i këtij urdhërimi në praktikë, dëshmia e tij në udhën e jetës: “Nuk
mjafton të thuash: ‘Unë besoj në Zotin, Hyji është i vetmi Zot’. Mirë, mirë, por si
e jeton ti këtë në udhën e jetës? Sepse mund të themi edhe: ‘Zoti është i vetmi Hyj,
nuk ka tjetër’, por të jetojmë sikur të mos ishte kështu e sikur të kishim në dispozicion
hyjni të tjera… Pra, ekziston rreziku i idhujtarisë: idhujtari që vjen drejt nesh
nga fryma e kësaj bote. Por Jezusi ishte mëse i qartë: fryma e botës, jo! E i kërkon
Atit në Darkën e Mbrame të na mbrojë nga kjo frymë, që na çon drejt adhurimit të idhujve”. “Idhujtaria – vazhdoi Papa Françesku – është e hollë”. Secili prej nesh ka idhuj,
që fshihen në skutat e zemrës së vet. Udha për të shkuar drejt Mbretërisë së Hyjit,
na bën t’i zbulojmë këta idhuj dalëngadalë e t’i luftojmë. Prania e idhujve të fshehur
vihet në dukje që në Bibël, në episodin e Rakelës, gruas së Jakobit, e cila bën sikur
nuk i ka me vete idhujt, që ka marrë nga shtëpia e të atit dhe i ka fshehur në shalën
e devesë. Edhe ne i fshehim, theksoi Ati i Shenjtë, por duhet t’i kërkojmë e t’i shkatërrojmë: “Besnikëria
(ndaj Hyjit) na kërkon t’i largojmë idhujt, t’i zbulojmë: fshihen brenda personalitetit,
në mënyrën e të jetuarit. Por këta idhuj të fshehur bëjnë të mos jemi besnikë në dashuri.
Shën Jakobi Apostull, kur thotë ‘Kush është mik i botës, është armik i Zotit’, ia
fillon duke ngritur zërin: ‘Kurorëthyes!’. Na qorton me fjalën ‘kurorëthyes’. Pse?
Sepse kush është ‘mik’ i botës, është idhujtar, nuk i qëndron besnik dashurisë së
Zotit! Udha për të mos qenë larg Mbretërisë së Hyjit, për të ecur drejt saj, është
udhë e asaj besnikërie, që i ngjan dashurisë martesore”. Si është e mundur
të mos i qëndrojmë besnikë kësaj dashurie, pavarësisht nga idhujt, që mbajmë fshehur
në zemra? – pyeti në fund Papa Françesku. Sepse është e nevojshme t’ia besojmë veten
Krishtit, që është “besnikëria vetë” e “na do shumë”: “Mund t’i lutemi sot
Jezusit: ‘O Zot, ti që je kaq i mirë, ma trego udhën për të qenë çdo ditë, më pak
larg Mbretërisë së Zotit, udhën për t’i hedhur poshtë të gjithë idhujt’. Është e vështirë,
por duhet t’ia fillojmë… Idhujt e fshehur në sa e sa shalë devesh, që kemi brenda
vetes, në mënyrën e jetesës: ta hedhim poshtë idhullin e përkatësisë në këtë botë,
që na bën armiq të Zotit. T’ia kërkojmë këtë hir Jezusit, sot”.