Nesër nxënësit e shkollës Atë Pjetër Meshkalla takojnë Papën Françesku. Do t’i
rrëfejnë historinë e Shqipërisë ‘nga errësira në dritë’.
Ati i Shenjtë Françesku do të takojë në audiencë të veçantë 9.000 studentë e nxënës
të instituteve shkollore të Jezuitëve në Itali e ata të gjimnazit Atë Pjetër Meshkalla
të Shkodrës. Me ta do të jenë edhe profesorë, prindër e ish-nxënës të shkollave të
jezuitëve, të cilët para Papës do t’i prezantojë delegati i Provincës së jezuitëve
të Italisë, atë Vitangelo Denora, ndërsa grupin e 54 shqiptarëve e udhëheq drejtori
i shkollës “Atë Pjetër Meshkalla” atë Lello Lanzilli. Në audiencën me Papën, në Sallën
e Palit VI në Vatikan, të rinjtë, të shkollave të niveleve të ndryshme, do të lexojnë
letrat, do t’i paraqesin vizatimet, do t’i japin dhuratat, e sidomos do t’i drejtojnë
pyetjet e tyre drejtpërsëdrejti Papës, i cili do t’u përgjigjet menjëherë. Grupi i
gjimnazit “Atë Pjetër Meshkalla” do të shpalosë historinë e Shqipërisë, nga persekutimi
tek ringjallja me temën “nga errësira në dritë”. Dhurata që të rinjtë e gjimnazit
shkodran do t’i bëjnë Papës Françeskut është Kryqi me fotografitë e 40 martirëve të
Kishës katolike shqiptare, po më tepër mbi këtë takim të nxënësve me Papën Françesku
të dëgjojmë jezuitin atë Lello Lanzillin...