Հարաւկովկասեան Շրջանին Մէջ Անվտանգութեան Ապահովման Հարցը Ուաշինկթընի Համար Աւելի Կարեւոր է

ԱՓԱ լրատու գործակալութիւնը կը հաղորդէ, որ Ազրպէյճանի մէջ Միացեալ Նահանգներու դեսպան Ռիչըրտ Մոռնինկսթար ըսած է, թէ «Միացեալ Նահանգներու արտաքին քաղաքականութեան մարզին մէջ ուժանիւթային նշանակութեան մասին կարծիքները չափազանցուած են»:
Դեսպանը աւելցուցած է, որ հարաւկովկասեան շրջանին մէջ անվտանգութեան ապահովման հարցը Ուաշինկթընի համար աւելի կարեւոր է: «Ազրպէյճանի եւ Թուրքիոյ դերը դէպի Արեւմուտք ուժանիւթի մատակարարման աղբիւրներու եւ ուղիներու բազմազանեցման եւ համաշխարհային ուժանիւթի անվտանգութեան ապահովման գործին մէջ հետզհետէ կ՛աճի: Սակայն Միացեալ Նահանգներու արտաքին քաղաքականութեան մէջ ուժանիւթի դերը պէտք չէ չափազանցել… Մենք հանդէս կու գանք Լեռնային Ղարաբաղի տագնապի լուծման օգտին, ինչ որ սակայն ուժանիւթի նախագիծերու հետ կապ չունի: Մենք շրջանին մէջ անվտանգութեան ապահովման հարցերը ուժանիւթի ծրագիրներու իրականացումէն վեր կը դասենք», նշած է ան: